ماده خام

ماده خام للابتهاج

حضن دافى

وش صافى وكلمه حلوه

ورده و عصفوره و قطه صغيره

قبه سما مفتوحه منوره

سحب بيضا على خلفيه زرقا 

راسمه وشوش اطفال مدوره

صوت خرير ميه يريح الاعصاب

قعده فى جنينه ولمه للاصحاب

هدهد ينط على النجيله بتاج جميل

وكل ريشه بلون جمالهم مستحيل

ينقر فيتهزوا معاه ويرفع راسه يبرقوا فى نور الشمس

يلمح عنيا عليه وفورا يختفى 

ماده خام للاكتئاب

كلمه قاسيه

وتكشيره تقفل يوم جميل

ناس بتصحى تقول ياشر اشتر

ناس تشك فى اقرب ناس

كفا الله الشر

ناس على طول متذمره

متكدره و مكشره و بتشكى هم

كلامها ياساتر كله غم

مابيحمدوش نعمه ولا يشكروا نعيم

مع انهم مرفهين و منعمين

بيبصوا بس ع اللى ناقص منهم

مع ان فى غيرهم ماحلتوش اللضى

و مبسوطين ...

خيوط

خيوط شاده و مشدودة
مابين الخلق ممدودة
مابين عالى و متعالى
وشايف نفسه سيد الناس
وماسك طرف مصالحهم و ارزاقهم
يحركهم يمين و شمال

بدون احساس

وليه لاأه ؟

دا سيد الناس!!
يعلى فى اللى على كيفه
 و يخسف بالى يقوله لأه  سابع ارض

وناسى ان فيه اله واحد

اله خالق

اله عادل
بينصر كل يوم مظلوم

ويدى كل يوم محروم 

اله خافض

اله رافع 

كريم و عظيم 

غنى و رحيم.

منه لله الحمار

مع انى بجد باحترم الحمار و مش موافقه إطلاقا على استخدام اسمه كوسيلة للتحقير او شتيمة البنى آدمين، أنا مضطرة النهاردة انى أدعى عليه من قلبى لانه كان السبب فى إصابتى أنا و دكتوره من أعز صاحباتى و مجموعه تانيه من الدكاترة المحترمين فى طريق رجوعنا من الجامعة.

 احنا كبنى ادمين عموما و كمصريين بالتحديد عندنا نزعة للتقليل من شأن الكائنات الأخرى ...يعنى مش كفايه ان ربنا سخرهالنا تخدمنا و تفيدنا و مانقدرش نعيش من غيرخيرها، لكن برده الجبروت و الصلف الإنسانى موجودين و الحمار للأسف واخد نصيب الأسد من التريقه و التسفيه.

حتى انا وانا باتكلم فى محاولة لإنصاف الحيوان ،  مالقيتش تشبيه غير "نصيب الأسد" مع إن الأسد قاعد مذلول فى حديقة حيوان الجيزه جربان من قلة النظافة وجعان مش لاقى حتى عضم يمصمصه  لأن معظم حمير مصر ادبحت!

نرجع بقى للحمار...   المدرس يلاقى عيل غبى فى الفصل يقوم يناديله ياحمار، روح يا حمار، تعالى ياحمار، ذاكر ياحمار و يطلب من الناظر يستدعى ولي أمر الحمار!  

 المدير فى المصلحة يلاقى عنده موظف ابن حلال و شغيل و مش بتاع تزويغ يقوم مدلعه و يقول عليه قدام زمايله في محاولة لتحفيزهم دا فلان "حمار شغل". الموظف الغلبان يبقى ياعينى مش فاهم هو كده بيتمدح ولا بيتشتم فيكمل شغل و خلاص، زي الحمار!

حتى انثى الحمار نابها من الحظ جانب و بقت هى مثل لاى ركوبه تعبانه من خلال المثل العتيق  "حمارتك العرجاء تغنيك عن سؤال اللئيم".  وطبعا لايخفى عليكم التفرقه العنصريه اللى فى المثل ده اللى عملته حماره بدل حمار!  خد عندك كمان تصنيفات فرعيه للحمير فتلاقى حمار حصاوى وحمار الغيط و الحمار فى النجيله .. ولو كان عندى وقت كنت بحثت و لقيت انواع كتير!  

حتى تراثنا الأدبى و الفلكلورى البديع ماسابش الحمار فى حاله: تلاقى عندك حمار جحا و عشرات النوادر عليه و طبعا عندك حمار الحكيم، و غيرهم الحمير كتير ماشاء الله.

الحمار بتاعنا النهاردة بقى حمار عادى خالص ، غلبان و شقيان، مربوط فى عربية كارو متحمل عليها بلاوى و ماشى فى عز القيالة فى شوارع القاهرة فى يوم من أيام الموجة اللى وصلت فيها درجة الحرارة فوق 48 درجة.  هيعمل إيه المسكين، زيه زى حمير كتير بيعملوا شغلهم على أكمل وجه و أجرهم على الله.   لا اشتكى ولا اعترض، العربجى يقول يمين، يروح يمين ، يقوله شمال، يروح شمال...

المشكله بقى كلها حصلت لما راح شمال بناءأ على تعليمات القائد العربجى  و الشمال ده للأسف كان على بعد نص متر من اتوبيس الجامعة بتاعنا اللى مليان أعضاء هيئة التدريس المحترمين راجعين بيوتهم بعد عناء سفر و شغل فى الكنترولات و الامتحانات و متحملين نفس الظروف الجوية اللى الحمار مستحملها!

السواق طبعا ماكانش قدامه حل غير إنه يدوس بكل عزمه فرامل عشان ما يخبطش الحمار المسكين. أكيد مش ذنبه إن كان فى دكاتره بدأت تقف إستعدادا للنزول فى محطاتهم المعهودة.  و طبعا كالعادة دايما أنا كنت واحدة من سعداء الحظ مع إنى بانزل فى آخر محطه و كان لسه قدامى أكتر من ساعة. لكن الحظ يشاء انى كنت راكبه جنب صاحبتى و حبيبتى اللى كانت هتنزل فقمت عشان أعديها.  و حصلت الكارثة فى نفس ذات تلك اللحظه المشؤومة! 

طرررراخ..... و لقينا ازاز الاتوبيس مشروخ و الحمد لله انه مااتنترش و بهدلنا....

مش هاحكى تفاصيل الاصابات بقه و الدكاتره و جلسات العلاج الطبيعى اللى لسه شغاله حتى حينه عشان مابقاش ممله. لكن الحمد لله جت سليمه و الحمار الحمد لله ماجرالهوش حاجه

ورجع يعمل كل اللى مطلوب منه دون اعتراض أو شكوى... 

الشيء العجيب بقه فى كل اللى حصل ان اعضاء هيئه التدريس الموقرين اللى حضروا الحادثه كانوا

مضطرين يوقعوا  طلب للجامعه عشان استبدال الازاز المشروخ ويقولوا فيه ان فى طوبه طارت و كسرته على اساس ان الحمار مش من حقه يعمل حوادث!!!!  او يتحسبله مثلا اجازه للنقاهه او نعتبرهاله اصابه عمل!!!!

يعنى مهضوم حقه حتى فى الاصابات

بذمتكوا مش كائن عظيم و مواظب؟

وعشان كده انا باعتذر عن العنوان و فى المره الجايه اللى هاكتب عنه هيكون العنوان "عاش الحمار".

الرحله المسحوره بين القاهره و المنصوره ٣

يلا يابيرو بقه بلاش دلع، ده تانى مايكروباص يقف لنا وانت مش عايزه تركبى، احنا خلاص مش هنلحق الفطار!

ده برده صوت العقل و الحكمه اللى قلتلكم عليه و اللى كان السبب اننا نركب باص الجامعه العطلان اللى مافيهوش تكييف و نقعد ناحيه الشمس!!

الصراحه الواحد احيانا لازم يثق فى احساسه و مايسمعش صوت العقل!!!

بس برده عملت نفس الغلطه تانى

و سمعت صوت العقل

الميكروباصات الحقيقه كانت بتقف لنا من نفسها و الاخير ده كانت حالته مزريه بس ماحبيتش اتبطر على النعمه و ازعل استاذتى 

و ركبنا!!!

كل واحده قاعده حاضنه شنطه الورق زى ابنها الرضيع

و من حسن حظى كمان انى كنت قاعده فى الطرف خالص

الكرسي اللى بيتنى ده

ولان سواق الميكروباص راجل متعاون ، كان اى حد عايز ينزل فى اى حته كان بيوافق ينزله

ولانى انا محظوظه كالعاده

كنت باضطر انزل انا و شنطتى علشان ننزل الركاب اللى ورا!!!

و فين و فين على ما ادركت انى ممكن انقل ورا اصلا ارحملى و اسيب استاذتى جنب الكرسي اللى عرفت على اخر الرحله ان شهرته " الكرسي القلاب"!!!!

بجد الرحله كانت هلاك لواحده زيي اساسا عندها مشاكل صحيه

بجد الشعب المصرى ده حمول و عظيم و برغم كل حاجه فيه لمحه تحضر بتظهر وقت اللزوم

البنت اللى جنبى اصرت تاخد منى شنطه الورق و تبدل مكانها معايافى لمحه انسانيه جميله. 

على نهايه الرحله فى عبود كان الميكروباص وقف ينزل و يركب حوالى ٣٠ مره. 

وفى ركاب نسيوا اننا صايمين و بدأوا يتخانقوا مع السواق

الظاهر ان الطبيعى انه كان يركب الناس مره واحده و ينزلهم فى نهايه " الخط" 

بس هو كان طماع حبتين! وفضل ينزل و يركب طول الوقت

ده طبعا ضاعف مده الرحله

وعدد الفرملات اللى كانت بترجنا

و لان الكراسي كانت تقريبا لامسه الارض، كنا بنحس بكل طوبه يعدى عليها الميكروباص

كميه رجرجه و مطبات مش معقوله ادت الى تزحزح فقراتى اللى هى اساسا مش مظبوطه

وشد عضلات ظهرى و رقبتى لحد النهارده

و فجاه وقف السواقو اعلن ان ده اخر الخط بتاعه

عادى يعنى مل واحد عامل لنفسه خط لوحده

بس ياعم ده مش عبود!

ماليش دعوه ياست انا باقف هنا!!

ياست؟!!! بيقول للاستاذه الدكتوره ياست!!!

طبعا نزلنا جميعا و الحمد لله 

لقينا تاكسيات تقف لنا و المغرب بيدن

رمضان كريم عليكوا

رمضان كريم ياجامعه بتحترم اعضاء هيئه تدريسها وتوفر لهم احسن ظروف للعمل و الابداع!!

الرحله المسحوره بين القاهره و المنصوره ٢

يلا ..استعنا على الشقا بالله...

- بس الاتوبيس ده مش مكيف يا دكتوره و درجه الحراره فوق الاربعين و احنا فى الصيام!!

- معلش بقى نستحمل ....ماتنسيش ان معانا ورق امتحانات و مش معقول نتمشى بيه فى المواصلات العامه... برده اتوبيس الجامعه امان و كفايه انك فى وسط زمايلك...

طبعا ده صوت العقل و الخبره.. صوت زميلتى و استاذتى 

وانا اساسا مافياش نفس اخرج من الجامعه بشنطه ورق وزنها طن و اقف فى الشمس استنى تاكسي يحن عليا و يوصلنى المحطه فى ساعه عشان سبب تافه ان اتوبيس الجامعه مش مكيف!!

قلت لنفسي عيب عليكى ياشيخه... اجمدى بقه و استحملى الحر... اذا كان كل الاساتذه دول اللى منهم ناس اكبر منك بعقود من الزمن مستحملين وحتى مش بيتذمروا من الاتوبيسات العتيقه اللى من غير تكييف ولا عفشه...

عيب عليكى بقه خليكى راجل...

المهم بعد مداولات طويله انا و نفسي الطماعه اللى عايزه تركب اتوبيس مكيف و مابياكلش المطبات كلها...

انتصر الجانب الخير الصبور المضحى فيا و رفعت شنطه الورق اللى ادت لتمزق فى اربطه الكتف و عادى جدا طلعت اتوبيس الجامعه

بس برده النفس اماره بالسوء

فضلت توسوس لى خصوصا لما لقيت انى هاقعد ناحيه الشمس

طبعا لانى لكعه و اتاخرت على ما استلمت الورق و مشيت تحت الشمس الساطعه لحد الاتوبيس

بس خلاص بقه مابقاش عندى طاقه انزل تانى

الامر لله

هاقعد فى الشمس و اتسلق و اهه كله فى ميزان حسناتى باذن الله

واهى كلها اربع ساعات و نوصل بالسلامه

و علقه تفوت ولا حد يموت...

اليوم ده بالذات بقى ماكانوش اربع ساعات!

الاتوبيس المتين وصل عند اجا وقطع النفس... وأبى و أصر ألا يتحرك قيد أنمله
شكله كان صايم و مهنج زيي ولا أيه؟

السواق و جميع دكاتره الهندسه بذلوا محاولات مضنيه عشان يصلحوه وهو رافض يتزحزح من مكانه

عدت ساعه وزياده...

و الكل اتوتر لاننا غالبا مش هنلحق الفطار

الدكتورات المحترمات نزلوا يقفوا فى الطريق من كتر الحر

كل واحده بتفكر ياترى هتوصل بيتها ازاى و امتى

ياترى الولاد هيفطروا ايه و هى مش موجوده!!

مابقاش فى وقت ولازم نتصرف

وبدأت الاقتراحات...

اللى اقترح اننا ناخذ تكتك لحد اقرب بلد فيها مواصلات للقاهره...

واللى اقترح اننا نحاول مع اووبر...

واللى اقترح ان اسهلنا نرجع المنصوره و نتصرف من هناك لاننا كده كده مش هناحق الفطار

كل دول كانوامسافرين بطولهم وعادى يقترحوا حلول...

انا وزميلتى بس اللى كان معانا قنابل موقوته...

ورق امتحانات لو ورقه ضاعت نروح ورا الشمس

اكيد مش هنركب توكتك بالورق

ولا فى حاجه اسمها اوبر بين المحافظات

مابقاش قدامنا غير الوسيله المعهوده لشعب مغلوب على امره

الميكروباص!!!

وقد كان....

يوم تانى بقى احكيلكوا  الاهوال اللى حصلتلنا فيه

انا اصلا تعبت من مجرد الذكرى!!!!
رمضان كريم ياجامعة!

نفس داخل ..نفس خارج

نفس داخل نفس خارج

فى ثانيه الدنيا بتولى

بنقسى ليه ونتخانق

بنظلم بعض و نحارب

على ارض و على لقمه وعلى منصب

وكله بايد اله خالق

اله عادل اله رازق

وكل الدنيا ياخساره

نفس داخل

نفس خارج

هروب

دفنت دماغى فى روايه

هاعيش عيشه ماهيش عيشتى

هنام نومه غير نومتى 

 هفكر بعقل غير عقلى

و هاكل اكل غير اكلى

هحس بحاجه غير اليأس

وحتى جسمى مش جسمى

مافيش أوجاع مافيش فى كل لحظه صداع

مافيش طلبات ولا اهانات ولااهات

هعيش عيشه ماهيش عيشتى

هعيش فى روايه و استنى

هاسافر بلاد غير بلدى

هلف الدنيا و اتفرج

و يمكن حتى اتزوق و اتبهرج

ويمكن ربنا يفرجها و اهرج

ويمكن افرح بجد من قلبى 

بدلل مارسم دور السعاده واخلى الكل يتفرج

ويحسدنى على العيشه و ع التعليم و ع الاولاد و ع 

الحاجات اللى بقت بلا معنى ولا فحوى 

واعيش عيشه ماهيش عشتى

وارضى بدور ماهوش دورى 

انسي انى طول عمرى باحاول اهرب من العالم 

بعالم تانى مش موجود

فادفس راسي فى روايه

واعيش عيشه ماهيش عيشتى