To Hell with ALL Brands!!

الماركات

عاوزة ، عاوز ، هاتيلى, إشتريلى ، لسه ما جبتش : هى دى مفردات حياتى مع العيال كلهم خصوصا ً التوأم العجيب ريا وسكينة. لا طبعا ً دول ولد وبنت بس مش لا يقة لهم اسم حركى مناسب .

·        عايزة مضرب ""Babollat  .... زى بتاع نادال

·         "نعم ؟ هو انت رايحة Wimbledon ؟ "

·        "لازم أغير الجريب بتاع المضرب ... وعايزة vibration  كمان علشان ضاع منى فى الملعب".

-         "هو كل مرة يضيع؟   إنتى مش بتدورى عليه ليه؟ و تركبيه تانى "

-         "يا ماما ده بتاع بـ 13 جنية إيه يعنى؟"

-         "كل مرة يقع طب... وبعدين ؟ "  

-         "هاتيلى شوية خليهم من البيت . المرة اللى فاتت الكابتن قالى هأقلبلك الجريب القديم ما هو لسة شغال ولازم توفروا . يعنى لسة معايا الجريب البينك القديم"

-         يا فرحتى ! طب ما تسمعى كلام الكابتن وتوفرى فى كل حاجة"

-         طبعا أنا بأتكلم مع نفسى لأن هى مش بتسمع.... هى تطلب وبس.

-         "شنطة التنس اللى عجبت على موجوده فى محل فى city stars  وهو هيموت عليها ...             لازم تجبيها له . يا ماما دى حاجة هايفة"

-         هو إنت المحامى بتاعه... ما هو بيقول هو عاوز ايه ."

-         هو قالى أنه عاوزها دلوقتى وعليها "sale    كمان.

-          هو ده نمط كلامنا أنا و التوأم اللذيذ.... كل يوم نصحى "العصر" نشوف حاجة تكون  " ماركة "  علشان نعوز نشتريها..... وهى دايما تدافع عن إختياراته.... وتزن على الحاجات اللى هو عاوزها .
 من صغرها كانت تدافع عنه فى الحضانة والمدرسة والنذل كان بيسيبلها شنطته علشان تشيليها له لحد البيت .

-         كبرت البنوته بقت 14 سنه عسل ولذيذة وآخر رخامة . الزن لعبتها المفضلة ويخرب بيت النت على الماركات....
 كل حاجة جديدة عاوزاها... وياريت تكون بينك pink  
بس لو مش متوفرة فى مصر ممكن تتنازل وتجيب لون تانى
 بعد محاولات مضنية اننا نشتريها من على النت ....طبعا ً كل المحاولات باءت بالفشل لإننا إتنصب علينا قبل كده من اللذوذة الكبيرة اللى بقالها سنين بتطلب "لبن العصفور " من النت وغيره ."
بطلنا نشترى من النت وقريبا ً جدا ً... هنبطل نشترى من المحلات لسؤ الأحوال الإقتصادية فى بيتنا  العامر بالطلبات المستعجله,,,,
 و ربنا يجعله عامر!!

أم المراهقين مش أم المصريين

Abeerxx66@yahoo.com