From China with love : food 1

الصين بلد جميله وكل حاجه بس من ساعة ماوصلناها واحنا بنتعذب و نتضور جوعاً . لا عارفين ناكل في الفندق ولا المطاعم خصوصاً بعد ما العيال شافوا المحلات اللى بتعرض بكل فخر و اعتزاز لحمة الكلاب و الحمير و الخنازير!  

و عشان تعرفوا حجم المعانة الى احنا فيها اليكم المحادثه بين افراد العيلة الكريمه في مطعم الفندق:

على:  ينهار اسود حتى البيض المسلوق حاطين عليه الtouch بتاعهم !

عبد الله : احنا مش هينفع ناكل اى حاجه فى البلد دي ان جعااااان ايه القرف ده !!!

انا :على فكره يا على ده  بيض مسلوق عادى بس سالقينه فى شاى بدل الميه. انا هجرب واحده!!! 

نورا الاموره :اه يا على ماما صح. حتى شوف كاتبين tea eggs

على :  طب يا فالحه روحى قشرى واحده و كوليها, روحى روحى روحى.....ماروحتيش ليه؟

انا طبعاً مش مقتنعه بالى بقوله للعيال بس نفسى ياكلوا اي حاجه بعد ما فشلنا ناكل فى مطاعم عاديه و المطعم الاسلامى الى كنا سانين سنانا عليه طلع under construction .

 المهم اخدت البيض المسلوق وشوية خضار مسلوق من بتاعهم و قلت ربنا يعين و اقدر اكلهم عشان اثبت للعيال اننا ممكن ناكل عادى من ال western buffet بتاع الفندق مع انه لا western ولا اى حاجه

قعدت و بدات اقشر البيضه بكل شجاعه و مش متخيله ان على واقف بيراقبنى من بعيد عشان يشوفنى هاكلها  فعلاً ولا ايه....
طبعاً ابنى ناصح وما تخيلش عليه حركات الامهات المفقوسه بتاعتى

اول ما خلصت تقشير البيضة و لاقيتها سودا و ريحتها زي الزفت اديرت ادور على اى باسكت ارميها من غير ما العيال يشوفونى و يشمتوا فيا.

مفاجأة.....
لقيت التوأم العجيب و عبد الله ناطين ورايا

قفشناكى يا ماما وانتى قرفانه من الاكل زينا وبتحاولى تخلينا ناكل و خلاص

وهنا انهارت محاولاتى للتماسك قدام الاكل و رحت معترفه لهم انى انا كمان مش ناويه اكل الخضار المريب الى فى الطبق و طلعنا كلنا اوضتهم ناكل بقية الشيبسى الى كنا جايبينه من مصر و محوشينه لبقية الرحلة لان حتى الشيبسى بتاعهم فيه  دهون مريبه   !!!!
 

نصيحه هامه لو عايزيين تتهوروا و تروحوا الصين املوا شنطكوا اكل لان مش هتلاقوا اي حاجه هناك تتاكل !!! 

ومع ذلك البلد تححححححفه و تستاهل الزياره واهو ريجيم اجباري يفوت و لا حد يموت. 

Sent from my iPad