على الزئبقى
بدأ موسم الإمتحانات ، كل سنه وإنتم طيبين .
ده الموسم اللى أنا وعلى بنلعب فيه مع بعض توم وجيرى .
طبعاً أنا توم وهو جيرى
.
لأ لأ بلاش التشبيه المهين ده .....
يعنى إيه أنا أبقى توم وأفضل أجرى وراه وكل
مرة هو يضحك عليا ؟
لأ طبعاً . التشبيه ده مش مظبوط خالص .
على فى فترة الإمتحان بيتحول لكائن زئبقى .
عارفين الزئبق اللى ما حدش
بيقدر يمسكه ولا يلحقة ؟ هوده على
أنا طبعاً لازم أتفرغ على كنبة الليفينج ( غرفة العمليات المركزية ) فى
البيت لإنها تفصل بين الصالون والسفرة من ناحيه و باقى الأوض فى الناحية الثانية و
معاهم المناطق الحيوية الهامة ألا وهى المطبخ والحمامات .
يعنى أنا أصحى بدرى ( علشان هم عندهم إمتحانات ) أخلص اللى ورايه وآخذ
موقعى الإستراتيجى على الكنبة علشان أراقب جيرى ، قصدى على الزئبقى وهو بيهرب من
المذاكرة بمعدل 3 مرات فى كل 1/4 ساعة . مع العلم أنه 1/4 ساعة هى أطول مدة مذاكرة
وصلها فى اليوم كله .
-
- ماما أنا جعان
-
- طيب هأعملك ساندوتشات
-
-لأ أنا لسه وأكل... أنا عايز حاجة ثانية .
- -
إيه يعنى ؟
-
-عايز حاجة حلوة .
-
-عندك شوكولاتة على السفرة .
-
-خلصت .
-
-طيب عندك كيك فى العلبة .
-
-لأ مش عايز... يلا نعمل وافلز
- -
وافلز إيه دلوقتى يا على .... طيب ذاكر انت وأنا
هأعمل .
-
-لأ عايز أنا اعملها معاكى دى لعبتى .
وبما أن على حجة فى عمل ال waffles وبيعملها تحفه أنا دايماً بأوافق و أروح وراء الشيف
المطبخ علشان أناوله المقادير اللى هو حافظها صم ونبدأ المهمة .
أولا ً : يفضل يضرب فى بياض البيض لمدة لا تقل عن 20 دقيقة – يعنى أكثر من
مدة المذاكرة اليومية اللى أخرها 15 دقيقة .
ثانياً : نخلط باقى المقادير مع بعض ونضيف البياض اللى بقى عامل زى السوفليه
برفق وحنان وتأنى لمدة تتجاوز ال 25 دقيقة .
وبعدين بأة يجى وقت show
time وعلى بيسخن waffle maker ويبدأ شغل الفنان الحقيقى .
والنتيجة وافلز تحفه سخنه و منفوشة وملطخة بما لذ
وطاب من صوص الشوكولاته والفراولة والكراميل
وتبدأ
المرحلة الثانية وهى أكل الوافلز والتى قد تستغرق ساعة ونصف .
-
-الحمد لله كلنا
وشبعنا وحلينا ، ممكن نقعد بأة نذاكر .
-
-حاضر .
طبعاً على أحسن واحد – بعد عبد الله - يقول حاضر
فى البيت والتنفيذ زيرو.
بعد خمس دقائق
ألاقية خارج تانى من الصالون حيث موقعة فى المذاكرة وغالبا ينبطح أرضاً ويفرش
الورق والكتب والأدوات على الأرض ويفضل ماسك Blackberry لحد ما أنا أقفشة .
طبعاً لذيذ ياخذنى على قد عقلى ويسيب ال Blackberry
و بعد خمس دقائق تانين أدخل ألاقية فعلاً سايب ال Blackberry
بس ماسك ال I pod !!!
وهكذا يقضى على الزئبقى
أوقاته أيام الأمتحانات ويقضى على أعصابى وكل فرصة لى فى التركيز فى أى حاجة غير الجرى وراه!
أما عن مواعيد الدروس فحدث ولا حرج ..... طبعاً دى
كلها حاجات صغيرة ومش فارقة مع على .... يعنى درس يفوت ولا حد يموت . هو أساساً
بيحضر الدرس مجاملة علشانى ، وأحياناً مجاملة للأساتذة اللى هاريين نفسهم على
الفاضى .
أنا آسفة يا جماعة مضطرة أخلص ال Blog
حالاً لإنى لمحت jerry ، قصدى على الزئبقى متجه الى المطبخ ، ثانى .
وكل إمتحانات وإنتم ناجحين و مركزين.
