أحلام ...أحلام

أحلام ...أحلام

الروح شفافه 

الله .....إيه ده... أنا إزاى حاسه بالخفه والسعادة والرشاقة ديه؟

 هو أنا فين؟

وإيه اللى حصلى؟

يانهارى....دى أوضتى وده سريرى....مش ممكن ....أنا إزاى شايفه كل حاجه من فوق كده؟

أمال مين اللى نايمه على سريرى دى وشكلها مرهقه وعيانه؟

 يا الله...أنا مش فاهمه حاجة

  دى أنا ؟

ايوة...هى دى عيونى...بس إيه السواد اللى حواليهم ده؟ أنا مكانش عندى هالات سوداء وكانت رموشى أثقل من كده...وأطول هو إيه اللى حصل؟

-اللى حصل إنك اسأتى إستخدامى.... هلكتينى ...سهر وقراءة وكحل 

-إنتى مين يالى قاعدة تستجوبينى؟

-أنا عيونك اللى مش عجباكى مع إنك إنت اللى بهدلتينا ونسيتى إننا نعمه من ربنا لازم تحافظى عليها.

معقول؟ أنا فعلاً بره جسمى، أنا شايفاه من فوق، من مكان جميل وواسع ومنطلق.

شايفاه تعبان وضعف حجمه الطبيعى.

 إزاى تخنت كده؟ إزاى كل مفصل وعضله فيه بتوجع؟

إزاى وصل للدرجه دى من الإعياء والكسل؟

فجأه صحيت من النوم وقررت عدة قرارات:

مافيش سهر ولا شغل زياده

مافيش قراءة زيادة عن اللزوم

مافيش قلق و تنشنه

فى اجازة بجد

فى ريجيم قاسى

 علشان ا لمرة الجاية لما روحى تنفصل عن جسمى وتشوفه من بعيد مايجليهاش هلع!!!

The Pursuit of Happiness

Yes, I insist; life can be joyful. You must work hard to spot happiness anywhere and grab it. It will not come easy to you if you do not do your best to locate and to seize it.

 Despite the traffic jam, despite the rubbish heaps on every street corner, despite drivers cursing one another and homeless children selling tissue paper as a means of begging; despite non-stop TV commercials urging you to pay the last pound in your pocket to help save the life of poor sick children, or participate in the education of promising needy youth; despite all the misery in your heart and around you.

Despite everything… life can be joyful; life must be joyful. Don’t lose faith; don’t surrender to the tensions and worries; open yourself to all possibilities; open your eyes and heart to the little things that are the substance of happiness and life; look in the eyes of your child; listen to their pure laughter; rejoice in their unconditional love and acceptance of you; touch their hair and hug them; try to feel their heart beats; try to indulge in their little dreams and to make them come true. You don’t have a child? No problem, do this with any child, an orphan maybe.

The sight of a beautiful bird on a tree, a lovely flower in a garden; the smell of baking, a lovely dress on a little girl with smooth hair can change your mood. Just keep your senses open to the world, even if you happen to live in Cairo, and be keen on receiving little joyful things that will make you happy… for a while. Yes, happiness is brief, but it is worth taking the trouble to find.   Do this for yourself, because no one else can do it on your behalf, and because you deserve it. 

بهجة العيد

بهجة العيد

الله اكبر الله اكبر الله اكبر  لا اله الا الله

الله اكبر الله اكبر ولله الحمد 

كحك بسكر قبل صلاة العيد

نورا الاموره في اسدال جديد .....فوق لبس العيد

بالون احمر في ايد ولد لابس شورت جديد 

فستان اخضر بورد صغير على بنوته بديل حصان 

العيد فرحه.... بصوت صفاء ابو السعود 

حضن دافي و ناعم من احلى بنت في الدنيا

حضن تاني داااافى برده بس خشن حبتين من ابر ولدين

عيد سعيد فى مكالمه او رسالة من صديقه كنت ناسيه اد ايه واحشنى صوتها و كلامها 

او قريبه من سنه ماشفتهاش

هى دى بهجة العيد

حاجات صغيرة ...لذيذة ...ومعناها كبير

حاجات تفوقنا...و تغير مودنا 

و تقول الدنيا بخير

يلا نفرح و نحتفل بيها 

كل سنه وانتوا طيبين

إعتذار

إعتذار

المفروض إن المدونة دى مدونة خفيفة وساخرة ولذيذة . المفروض إنها عن حكاياتنا اليومية من منظور مضحك ومسلى . لكن بجد أنا مش قادرة أضحك , مش قادرة أكتب حاجة خفيفة, ولا أستمتع باى أحداث أسرية أو طرائف منزلية .

أنا حزينة ...

حزينة ....من القلب

حزينة على قد اولادى واخواتى اللى راحوا غدر قبل ما يبلوا ريقهم من الصيام .

حزينة على ولاد بلدى الشرفاء المسالمين اللى كان ذنبهم الوحيد إنهم قاعدين يحرسوا حدودنا فى سيناء فى قيظ الحر والعطش فى رمضان .

بجد قلبى واجعنى ...

بجد حاسة بكل ام كانت مستنية إبنها ينزل لها أجازة يقعد معاها شوية وتعمله فطار حلو أو ينزل يعيد معاها بعد رمضان .

 حزينة على العريس الشهيد حامد عبد العاطى اللى كان فرحه مفروض خامس يوم العيد .
 حزينة لإنه مش هيسكن فى الشقة اللى جهزها لنفسه

حزينة على أمه صباح العوض اللى لسة مش مستوعبه إنه راح للأبد .

حزينة على خطيبتة نعيمة زينهم اللى لبست إسود بدل فستان الزفاف الأبيض .

كل شهيد راح وراه أم وأخت وأب وأخ هينزفوا حزن لآخر العمر.....
 أنا حزينة ومش فاهمة ، بجد مش فاهمة اى حاجة .

يعنى أيه ناس قاعدين يفطروا ساعة الأذان ينضرب عليهم نار ؟

 يعنى إيه اللى بيضرب يصيح الله أكبر, الله أكبر وهو بيموت بنى آدم صايم ؟

يعنى إيه يوصفة بالخيانة ؟

 يعنى إيه يضربوا فى كل شهيد 10 طلقات أو أكثر وكلها فى الرأس والصدر ؟

يعنى إيه الغل والكراهية والسواد ده ؟

يعنى إيه سيناء يبقى فيها 2000 جندى مصرى بس ؟

يعنى إيه خطوط الغاز تتفجر 15 مرة ومحدش يعرف الجانى ؟

 يعنى إيه لازم ولادنا يموتوا عشان الجيش ينشر قواته ؟

أنا حزينة ...حزينة... حزينة

يارب صبر أهالى الشهداء وإرحمهم وإهدينا للصواب .

أم مصرية مكلومة 

My "Abeer" Friends

 صديقتى الوفية

القوية

عرفتها منذ سنوات حين كنت أعمل فى جامعة الملك خالد فى السعودية . هى ليست أستاذه زميلة ولكنها ومن أول لحظة تعرفت عليها دخلت قلبى كأخت وصديقه .

عبير راضى: ام مصرية لأربعة أطفال تنبض بالحيوية والنشاط . كل مشكلة عندها لها حل لأنها تؤمن بالله إيماناً عميقاً وتوزع باقات من التفاؤل والأمل أينما حلت .

أعترف أنى قاومت صداقتها لبعض الوقت.... لظروف تخصنى , وأعترف أيضاً أنى لم أصمد كثيراً للمقاومة أمام شلال من الحنان والإهتمام والسؤال أصرت هى أن تغدقة على . وعلى الجميع .....دون شروط.

 ومرت الأيام فأنهيت أنا إعارتى للسعودية وعدت لمصر وأنشغلت تماما بإعادة ترتيب أوراقى فى وطنى الذى بدا لى كمكان أراه لأول مرة . أستغرقت فى حياتى اليومية مع أولادى الأحباء فى محاولة لإعادة غرس الجذور فى أرض مصر . إنشغلت عن كل شئ حتى صديقتى .

وأعترف مرة ثانية أنى لم أنساها قط, فهى تستعصى على النسيان من كثرة المواقف الصغيرة المؤثرة التى حدثت بيننا .
 وكانت صديقتنا المشتركة ما زالت تعيش فى السعودية وتشكل حلقة الوصل المتباعد بيننا .

أعترف للمرة الثالثة كانت عبير راضى أكرم منى ، كانت دائمة السؤال على والإستفسار عن أحوالى و لم تنقطع أبداً محاولتها للتواصل معى فكنت فى كل مرة تبادر هى بالمحاولة... أحس بالخجل من نفسى وأعدها أنى سأداوم على الإتصال فتشغلنى الحياة ولا أوفى بالوعد .

لماذا أكتب عن صديقتى الآن ؟ لأنى أدركت فجأة كم أحبها وأفتقدها وأدعو لها الله بالشفاء العاجل الكامل فهى حتى فى محنه مرضها بادرت بالسؤال على والإطمئنان عن أحوالى .

عبورة .... إليك إعترافى الأخير: أنت أوفى وأصدق إنسانه عرفتها فى حياتى . أنت طاقة أمل وتفاؤل
 "وجدعنه " فلا تحرمينى أبداً من إهتمامك وحبك ودعائك ...

شفاك الله وعافاك وحفظك لكل من تحبين .

عبير الجمل

صديقة مقصرة

فيه عبير ثانية فى حياتى- لها أهمية ومعزة خاصة : د. عبير قدرى الزهيرى طبيتى وصديقتى الحبيبة ولازم أعترف بفضلها وأشكرها .

د. عبير طراز مختلف من الأطباء , سعه صدر وطوله بال. أما عن العلم والكفاءة والخبرة فحدث ولا حرج. صحيح مصر مليانه دكاترة هايلين ذوى علم وخلق لكن أنا جربت كثير كثير فعلاً منهم ولم أقابل أبدأ مثل د. عبير الزهيرى.

أول مرة قابلتها فى العيادة  كنت فقدت الأمل تماماً فى الآلام المزمنه والأعراض الغريبة الى بقالى سنين وسنين بحاول أتعالج منها.

رايحة وأنا حاطه فى اعتبارى إنها – زى دكاتره كثير قبلها- "هترزعنى" روشته مسكنات وجلسات علاج طبيعى وأرتاح شوية وكل حاجة ترجع زى ما كانت.

فوجئت بحاجه غريبه- دكتورة بتكشف على كل عضله و مفصل ووتر....دكتورة ماسكه ورقة وقلم وقاعدة تكتب كل الاعراض بكل تأنى ونظام وترتيب. وماسكه قلم High lighter وبتعلم على حاجات معينه.

لا وإيه بتفهم المريضه كل حاجه   بتقول تشخيص واضح وصريح ...حتى لو كان صادم....

صحيح عمار يامصر بناسك وأخلاقهم وعلمهم!!!

                                        صديقة موجوعة

الخواجه عبد القادر

مسلسلات رمضان

مش فاكرة أخر مرة تابعت فيها تمثيلية كانت إمتى – خصوصاً فى رمضان.

طبعاً دى الحقيقة مش محاباة للأخوة الإخوان أو السلفيين اللى شايفين إن الفن حرام وكل حاجة تؤدى إلى الفسق والضلال والفجور.

السبب إنى مش بتفرج على تمثليات إنى مش فاضية – لأ والله الكدب خيبة – حتى ولو فاضية مش بلاقى تمثيلية تستحق إنى أقعد أستناها 30 حلقة أو 999 حلقة لو التمثيلية تركى.

لكن طبعاً بشوف مقتطفات من كل حاجة وبأقدر أحكم على التمثيلية من المشاهدة المتقطعة لحتة من الحلقة الأولى على فتفوتة من الحلقة 17 ومشهد من الحلقة 29 و ساعات بأكون تنبأت بالحلقة الأخيرة بالضبط زى ما هى. لأ يا مؤدب إنت وهو....دى مش شدة ذكاء منى ... دة شدة غباء واستهبال وسوء تقدير من اللى بيعملوا التمثليات وهم متخيلين إن الناس اللى بتتفرج عليها عندهم تخلف عقلى أوعتة منغولى .

السنة دى فى حالة استثنائة و هى الخواجه عبد القادر.... تححححححححححححححححفة

 لا انا قريبة يحي الفخرانى ولا أعرف المؤلف ولا المخرج ولا بعمل دعاية للمسلسل.

 أنا بس مندهشة من قدرة الفن على إمتاع وإشباع المشاهدين بجرعة من الدين والموسيقى والفن فى نفس اللحظة.

إية الجمال دة ؟

إيه روعه أداء الفخرانى للشخصية؟

 إيه أصلاً الشخصية الشفافة ديه ؟

إزاى بيحصل التحول ده فى شخص ملحد و سكير لغاية ما وصل لأرقى مراتب التدين – التدين من القلب وبالقلب وإزاى النقلة الكبيرة دى تيجى بالسلاسة دى؟

 عندى مليون سؤال عن المسلسل دة.

المسلسل ده يسبب لك حاله من الدهشة والسمو تخليك تحس أن الخواجة ده عايش جواك وتتمنى توصل لمرحلة الصفاء والنقاء اللى هو وصلها من غير شيوخ ولاخطب ولا تخويف من الأخرة والعذاب والدمار والنار والقبور.

الله ، الله ، الله، مش لا قيه حاجة أجمل من لفظ الجلاله أوصف بيه جمال المسلسل .. وعلى فكرة مش بس شخصية الخواجة اللى تأسرك وترتقى بيك لمراتب من النقاء والتصوف...

حتى باقى الشخصيات خصوصاً الممثلين السودانين اللى عملوا أدوار فضل الله والشيخ الصوفى والناس بتوع الحضره .. مالهمش حل !!

 كانوا فين دول من زمان؟ كانوا مردومين تحت سيل الممثلات اللبنانيات والسوريين اللى مغرقين أفلامنا ومسلسلاتنا... كنا متجاهلينهم زى ما تجاهلنا بلدهم و القارة كلها وتعاملنا معاهم على إنهم ناس أقل مننا.

الحاجة الوحيدة اللى بتنغص علينا عيشتنا وإحنا بنتفرج هى فواصل الإعلانات إياها اللى غالباً بتكون أطول من المسلسل نفسه: يعنى 10 دقائق الخواجة و20 دقيقة إعلانات كلها إسفاف وإبتذال وتفاهه وكأن حرام نشوف حاجه محترمة على بعضها.

بجد اللى ما لحقش يتابع الخواجه عبد القادر لازم يلحق باقى الحلقات. ده مش تضيع وقت، دى الحاجة الوحيدة فى التلفزيون اللى فعلاً متماشية مع روح رمضان.

ألذ حاجة فى الموضوع ده إن على ونورا متحمسين فعلاً للخواجة عبد القادر وبيتفرجوا معانا عليه حتى لو بيجى فى نفس الوقت  "المقدس" بتاع America's got talent  

أظن المعلومة دى كافية تقنعكوا إنكوا تشوفوا الخواجة عبد القادر يمكن حد فينا يوصل لنقائه وشاعريته وتدينه الصافى على آخر رمضان.

اللهم إعنا على ذكرك وشكرك و طاعتك وحسن عبادتك وإجعلنا من عتقائك من النار فى هذا الشهر الكريم.

قولوا آمين.


الخواجة عبد القادر 2

مش عارفة أسميها أغنية ولا دعاء ولا مناجاه...

 المهم لما تسمعوا الحضرة اللى كان الخواجة عبد القادر بيسمعها وهو على بعد أميال من مكانها هتعرفوا إزاى الفن والشعر والموسيقى ممكن يوصلوا إنسان للتدين والتصوف.

نصيحة هامة: استمتعوا بمناجاة الحلاج فى حب الله ..  على الحان عمر خيرت ... فعلاً أجمل حاجة سمعتها فى رمضان ... أجمل حاجة سمعتها من زمان وطول الوقت بترن فى دماغى:

والله ماطلعت شمس ولا غربت....إلا وذكرك مقروناً بأنفاسى

ولا جلست إلى قوم أحدثهم....إلا وكنت حديثىى بين جلاسى

ولا هممت بشرب الماء من ظمأ ....إلا وجدت خيالاً منك فى الكأس

ولا ذكرتك محزوناً ولا فرحاً...إلا وأنت بقلبى بين وسواسى

ولو قدرت على الإتيان جئتكم....سعياً على الوجه أو مشياً على الرأس

Tomorrow   is   the  big  day

The   twin's birthday

Don't miss it!!!

High Heels

High Heels  

 

-         ماما أنا إتخنقت من البت دى هى وإصحابها

-         ليه ياعلى دى نونى توأمتك الجميلة زعلان منها ليه ؟

-         مش زعلان ، قرفان كل مرة نخرج معاهم هى وإصحابها يجبولنا تخلف عقلى أنا وإصحابى. 

-         لا بأه كده عيب ، دى هى وكل صاحباتها عسولات ولذاذ وولاد ناس.... هو أنتو أصلاً تطولوا تخرجوا معاهم .

-         آخر مرة فى عزومة رنا بتاعة التجمع فضلوا يتكلموا ست ساعات فى موضوع واحد... إنتى متخيلة ؟

-         موضوع إيه يعنى ، مش بنات وبيرغوا فى كل حاجة ؟

-         لأ طبعاً مش فى كل حاجة.... هى حاجة واحدة هايفة بس .

-         ما تقول بأه وتخلصنى .

-         الـ Heels  

-         Heels إيه ؟ الجزم يعنى ؟

-         لأ مش الجزم العادية الـ "High Heels  "

الملونة بتاعه إنجيلينا جولى وبرتينى سبيرز

-         ملونه لونها إيه يعنى ؟

أصفر ، أخضر ، أزرق ، أحمر ، بينك ، أورانج وحتى فيه ألوان قالوها أنا أصلاً مش عارفها .
 

لو سمعتوا صوت على وهو بيشتكى من نورا و صاحباتها وعاوج بقه مع كل لون وعمال يحرك إيديه بطريقه مايصه وهو بيقلد البنات كنتوا فطستوا من الضحك .

 بس أنا طبعاً كتمت الضحك لان حالته ما كانتش تسمح ، كان فعلاً مفروس من البنات كلها وعايز يموت أخته لإنها هى اللى فضلت تزن عليه يروح معاها .

وفضل يحكى لى إزاى كل واحده فيهم عاجبها لون Heels  معينه وعماله تخترع لبس يليق عليها .

 أو واحده ثانيه عندها فستان بلون معين وعامله إستفتاء شعبى  على   Face book   عن لون الـ Heels  اللى تشتريها علشان تمشى مع الفستان .

 كل ده وأنا بأحاول أهدى الولد وأفهمه إن دى أعراض طبيعية لسن المراهقة البناتى وان كلها كام سنه وهيخفوا ويبقوا زى الفل ويبطلوا يحسبوا شياكه البنت اللى قدامهم من طول كعب الـ Heels المطرقعة بتاعتها بس مافيش فايده ...كان دمة محروق من البنات كلهم .
 

ملحوظة :

 على فكرة أنا كمان مفروسة من موضوع الـ  Heels  لأنى بقيت بأشترى واحدة كل عيد ميلاد من بتوع الأمورات . وعلى فكرة أنا برده عارفة إن كل الامهات مفروسة زيى.... وبأقولهم وكل معلش   Heels  تفوت ولا حد يموت و ربنا يهدى كل حبيباتى البنوتات نورا وأصحابها الحلوات .

ملحوظة 2 :

نسيت أقولكم إن كل  Heels  بيبقى ليها توابع أخرى بسيطة زى توابع الزلزال : يعنى فى إصابات فى  ankle  والقصبة والسمانة وربنا يستر والـ Heels  ما تنتهيش بكسور لا قدر الله .

وأخيراً نصيحة للبنوتات اللى لابسة Heels  :

خليكى عملية وخدى معاكى باليرينا أو صندل واطى إمشى فيهم لحد الترابيزة وبعدين إلبسى الـ  Heels  ساعة الكاميرا و !! Say Cheese   يا أم  Heels !!!;