صباح الفل يا مصر

صباح الفل يا مصر

 

 

 

 

 

يوم الجمعة الصبح بدرى

ماتخافوش المرة دى مش هاشتكى ...مش هاجيب سيرة معبر رابعه ولا سيرة التفجيرات و الارهاب و الاخوان

المره دى انا فى مود تانى خالص

مش لان الغم و الهم خلصوا ولا لان مشاكلنا اتحلت

لا طبعا مش بالسهوله دى

بس برضة انا مصرة ان مصر دايما صباحها فل و ورد و ياسمين

انزلوا الصبح بدرى يوم الجمعه  و انتوا تتاكدوا بنفسكوا

هتلاقوا مصر الحقيقيه صاحيه فايقه و مبتسمه و مروقه و جميله

كل البوابين منهمكين فى غسل العربيات و مسح سلالم العمارات

هتلاقوا  راجل كبير طيب واقف على الناصيه و قدامه قفص عيش بلدى سخن و ريحته تفتح النفس

هتلاقوا  ام ولاء هى و بناتها اللى زى القمر شايلين الخضار الطازه المزهزه على راسهم و رايحين يفرشوه على الرصيف قدام الجامع

واحده فيهم هتفرش ورق كرتون عشان يقعدوا عليه

والتانيه هترص الخضره ...ياسلام البنت دى فنانه بجد

هتعمل من  الجرجير و الفجل و البصل الاخضرو الجزر و الفلفل و الطماطم لوحه بديعه

هتلاقوا ام ولاء قاعدة مستنيه زبون الاستفتاح و هى بتقرا الجرنال

هاكون انا الزبونه الاولى لانى فعلا باتفائل بالعيله دى

هاخد احلى دعاء من الست المكافحه دى... و بنتها هاتصر انى مااشيلش حاجه و تييجى توصلنى

مش عشان البقشيش على فكره....علشان هى اتربت صح...

على الناحيه التانيه هتلاقى بتاع الفول ... راجل رفيع جدا بس وشه منور بالرضا

 و ربنا مقدره يزق عربيه عليها قدرتين فول كبار سخنين نار

هتلاقى الناس اتلمت عليه لان الفول بتاعه " لووووز" زى ما هوا بينادى عليه

هتلاقى عربيه بحمار جايه من بعيد عليها اقفاص يوسفى و برتقال

هيتهئ لك ان العربيه ماشيه لوحدها و مافيش حد فيها

لما هاتقرب هتعرف ان الولد الى فيها يادوب عشر سنين و مش باين من الاقفاص

ما تقوليش ايه الحلو في منظر عيل صغير اهله مسرحينه على الصبح يشقى طول النهار

هاقولك ان الولد تلميذ شاطر بيساعد امه يوم الجمعه لانه حاسس قد ايه بتتعب عشانه هو واخواته الصغيرين

فوق المدرعه الى مرابطه قدام الجامع من شهر اغسطس الى فات

هتلاقى العسكرى الى سهر طول الليل يحمينا كلنا

هتلاقى زميله الى جاى يستلم منه مبتسم و نشيط و مستعد ليوم طويل

بالذمة البلد الى دول ناسها ممكن يحصلها حاجة وحشة!

ممكن اي حد يكسر ناسها و يخليهم يياسوا من الدنيا؟

البلد الى صباحها كفاح و شقا و اصرار ورضا  و ضحكه من القلب

لازم يكون صباحها فل

صباح الفل يا مصر...

جمعه مباركه و سعيده عليكى يا ام الدنيا.

 

انتحار روكا

"اذا كان الى بيتكلم مجنون يبقى الى بيستمع عاقل"

ده مثل من بتوع جدتى اكتشفت اخيرا ان حديقة الحيوانات العريقه بتاعتنا عملتة الشعار الرسمى بتاعها

من امتى؟

من ساعة ما الدبتين موتوا بعض و هم بيتنافسوا على قلب الدونجوان هانى الدبدوب الحبوب

من ساعة ما الجمال المغربى دبحت و شوت و اكلت نفسها

من ساعه ما الدب القطبى فطس من الحر مع انهم  مهيئين له الجو القطبى اللى متعود عليه

من ساعة ما الزرافه روكا شنقت نفسها

اى والله الزرافه انتحرت!

انا والله مقهوره على اللى بيحصل فى حديقة حيوانات الجيزه

طبعا هاخد تريقه للصبح

اللى هاتقول الست دى اتجننت و زعلانه على الحيوانات فى بلد الناس مالهاش فيها ثمن

واللى هايقفل البلوج و يقول ايه الهذى ده

بس انا برده هاكمل الكلمتين الى هايخنقونى

ايوه انا حزينه على الزرافة

مقهوره بجد

مش بس عشان دى روح راحت فطيس

ولا بس عشان احنا اللى دافعين تمنها من دم قلبنا

لكن عشان الحديقه دى ليها مكان فى قلبى و ذكريات جميله مع ولادى

ياما قضينا فيها ايام و هم صغيرين

ايام ما كان فيها بدل الزرافه الواحده تلاته اربعه

ايام ما كان الدب القطبى لسه ابيض و ما اتحولش بقدرة قادر للون غريب بفعل القذاره

ايام ما كانت الزباله لها مكان محدد

ده طبعا مش معناه ان الحيوانات كانت عايشه متهنيه و متدلعه

بس على الاقل ما كانتش مهمله لحد الاستهبال بتاع دلوقتى

لحد الدب الابيض ما يسود و بعدين يفطس من الحر لان ما فيش تلج يبردله الفسقيه النونو الى حاشرينه فيها

لحد ما الدببه الهيمانه فى حب هانى تاخد جرعة بنج زياده عن الطبيعى و يسيبوها تتسلق مكان عالى فتقع و تتقطم رقابيها

و بعدين يطلع المسؤلين فى الحديقه يلبسوها للدب الغلبان

لحد البجاحه اللى تخلى خبر الزرافه يتقال على انه انتحار مش اهمال

قال ايه الزرافه المتخلفه حشرت رقبتها فى السور الحديدى و هى بتاكل من شجره عاليه

ولانها حيوانه غبيه ماعرفتش تسلك نفسها فاتخنقت و ماتت

فى ستين داهيه!

زرافه غبيه نعمللها ايه يعنى!

غلطت و لازم تتحمل نتيجة عملتها السوداء

فعلا اللى يغلط لازم يتحمل النتيجه

خصوصا لو كان حيوان لا حول له ولا قوه

ولا عزاء فى الزرافات!