نملة حبنا ٢

نسيت اقولكم حاجه مهمه عن مميزات النمل بتاعنا الا وهى انه لماح و سريع التعلم

اول ما بدانا نرشه بالميه اتعلم السباحة وبقى بيعوم بريس و باك و كرول و بيتشقلب فى الميه و يطفوا و يصل لشاطىء الامان... قصدى الناحية الناشفه من الحمام بامان!

على قرر يغير استراتيجيات الحرب و يستعمل اسلوبه المميز منذ الصغر... 

هوا طول عمره بيحب الكبريت و كان محرمنى اشترى كبريت لانه بيخلص العلبه فى ثوانى..

بدا على حرب فرديه على النمل...يعنى نمله نمله يولع لكل واحده عود كبريت و يقربه منها.. تقوم النملايه متكوره على نفسها وتحسسه انها خلاص لفظت انفاسها الاخيره و اتفحمت واول ما الكبريت يطفى تقوم جرى و تمارس نشاطها بكل همه و حماس كالعاده... و تطلع لنا لسانها....

لما حرب الميه و النار فشلت معاهم قلنا نجرب الحرب البيولوجية...
وبما أنا اللى مختصة بالتغذية قررت أعمل لهم وصفات مدمرة من اللى الناس بتحطها على النت كل يوم
عملت أبحاث متأنية فى جميع المواقع صديقة البيئة و لو كنت بذلت نص المجهود ده فى ابحاث الترقية بتاعتى كان زمانى اترقيت بجدارة!
المهم بدأت أجرب النصائح الطبيعية الى بيقولوا عليها فعالة
السمسم ...
الخل...
قشر الخيار...
الكلور...
ماسيبتش وصفة الا وعملتها ...
بقيت أدخل المطبخ كل يوم بدل ما أطبخ للعيال اعمل وصفات للنمل ...
آخر وصفة جبتها من موقع أمريكانى و كانت مدعمة بالصور قبل و بعد... زى برنامج جويل بالظبط
خليط من السكر البودرة و طبعا ده عشان تجذب النمل و متلخبط عليه بيكينج صودا و دى اللى مفروض تموته
النمل الأمريكانى المغفل اكل السكر مع الصودا و مات بعد 5 دقايق

النمل المصرى الناصح اكل الخليط و انتعش و تلذذ عادى جدا....
انا مش عارفة هتقولوا عليا ايه لما اعترفلكو انى كل ما أدخل المطبخ بقيت اسمع النمل بينادى عليا بالاسم
ويقولى  كمان...كمان...كمان....
تفتكروا أنا اتجننت؟  ولا النمل بتاعنا هو اللى سوبر؟

نملة حبنا

نملة حبنا

كل يوم بيعدى عليا فى المطبخ احترامى للنمل بيزيد ويتكاثر و ينتشر و يتوغل فى أعماق قلبى!

بجد النمل بتاعى –احنا بقينا عيله و أهل من كتر العشرة- فعلا نمل سوبر

خارق للعادة...

صغير بس جبار...

لئيم و عبقرى و متفرد...

مقاوم لكل وسايل الإبادة الجماعية او... الفردية...

احنا بطبيعتنا عيلة مسالمة و صديقة للبيئة فمن الأول قررنا نتخلى عن المبيدات

اللى الناس مش مدركاة ان كل مرة بيرشوا مبيدات حشرية هما فى نفس الوقت بيسمموا نفسهم و عيالهم

طبعا جزء صغير منهم هوا اللى بيتسمم بس مرة فى مرة بيحصل ضرر

احنا فى بيتنا السنة دى استضفنا النمل بتاعنا و اكرمناه آخر كرم لأنه نمل فوق العادة

مختلف و متفرد فى كل شئ بجد

يعنى مثلا زيارته لينا و اختياره لمطبخنا كان فى ميعاد عجيب...

ألا وهو فصل الشتاء ....اللى كل النمل الطبيعى العادى الى خلقه ربنا بيكون فى حالة بيات شتوى مستخبى فى شقوقه و كافى خيره شره!

عشان كده احنا اتسامحنا معاه فى الأول وقلنا يلا... مش مشكله

يمكن حصل عندهم نقص فى المؤنة و مجاعة شتوية فقرروا يستعينوا بمطبخنا العامر

بس لما زودوها شويه و بدأوا  يستهبلوا و يروحوا الحمامات كمان

بدأنا نقلق و حسينا انهم داخلين على طمع

قلنا لا بأه...لازم نوقفه عند حده لحسن شويه شويه نلاقيه نايم جنبنا فى السراير

بدأنا بالوسائل السلميه و قلنا الطيب احسن!

دول مهما كانوا ضيوف عندنا ولازم نبقى ذوق معاهم حتى وهما بيحاولوا يحتلوا البيت

نورا بدأت معاهم الحرب على خفيف...

حرب مائيه لطيفه بلا عنف

كل ماتدخل الحمام تلاقيهم بيتفسخوا تجيب الدش و تبدأ تلعب معاهم بالرش و الطرطشه

و بعدين لما حبوا اللعبه و زادوا و تكاثروا فى الحمام

فكرنا خارج الصندوق -على رأى بتوع السياسه -ورحنا مطلعين مسدسات الميه الى العيال كانوا بيموتوا بعض بيها زمان لما كنا بنروح المصيف مع بعض كعيله كبيره

قوة الرش الفظيعه دى اكيد هاتطفش النمل و تخليه يقول حقى برقبتى!

بس للأسف مافيش فايدة

ومازلت الحرب مستمره و كل واحد فى العيله بيحارب حسب شخصيته و قناعاته

وهاعرفكم تباعا نشرة أخبار نملنا...