الأم 2

الأم 2

الأمومه وظيفه (طبعاً وظيفه بدوام كامل ومفروض يكون لها مرتب محترم) متعددة الجوانب والأبعاد والمأسى.

هى وظيفه unpaid  - unrecognized  - unappreciated

-         هى الوظيفه الوحيدة فى العالم اللى ما فيهاش أجازات .... ولا يوم فى السنة، ولا يوم فى العمر... اليك بعض المهام البسيطه:

-         وإنت أم ساعات لازم تشتغلى منبه  – بردة متعدد الوظائف ...

-         لإنك هتفضلى ترنى طول النهار:  يعنى الساعه سبعه تصحى بتوع المدارس الساعه 8 بتوع الجامعه

 الساعه 9 بتوع الشغل

والساعه 12 البهوات والهوانم اللى لسه مأنتخين ومفروض يصحوا يلحقوا الغذاء  .

-         طباخ: برده متعدد الوظائف، يعمل حلو و حادق ، سخن وساقع، ومحمر و مشمر، وكل يوم ماحدش يعجبه أكلك....

-     

    مدرس خصوصى: بردة لجميع المراحل..

+.

-          فى إبتدائى تعلمى أ ،ب و 1-2-3 .

-           وفى أعدادى تدخلى على ال science والدرا سات.....

-          وفى الثانونى تعترفى إنك محدودة التعليم وتستبدلى وظيفه المدرس الخصوصى بحاجه اجمد وهى 

-         السواق:

 تلمى العيال فى العربية وتروحى توزعيهم على المدرسين وبعدين تعملى الجوله الثانية وتروحى تلميهم من عند الناس اللى بياخدوا عندهم درس

-         ممكن بأة فى النص – وهم فى الدرس – تلاقيلك حاجة مفيدة تعمليها بدل ما تروحى البيت وتنزلى ثانى:

يعنى مثلاً تروحى ال Super market تلقطى شوية جبن وعيش وحاجات الفطار ... علشان المدرسه

أو تروحى الجزار... اهو  يقطعلك حتيتين لحمه ينفعوا على الغذاء.. بعد المدرسه

أو تروحى العطارة الهندية تلمى شوية توابل على مكرونات وأرز ..

 أو تروحى شركة الإنترنت : تدفعى الفاتورة المتأخرة.

أو تروحى السنتزال,,,, قبل ما يقطعوا عنك الحراره.

لو بأه كنتى شاطره والمشاوير كلها خلصت قبل ما العيال يخلصوا الدرس.. إحترمى نفسك وسنك وإترزعى فى العربيه تحت بيت المدرس...

إستنيهم لإن هيجيلك إنزلاق غضروفى من كثر النزول والطلوع فى العربية.

أما بأه  لو إنت أم محظوظه زيى – يعنى عندك أبطال فى الرياضه - فمهمه الأمومه عندك هيكون ليها أبعاد أخرى...

أكلمك عليها مرة ثانيه لأن عندى توصيل دلوقتى...بجد

الأم 1

1

الأم 1

كل سنة و انتم بخير...  شهر مارس وصل و يوم 21 قرب .

يعني كل واحد فينا هيجري يشتري هدية عيد الأم... على أساس إن ده كفاية للتعبير عن مشاعرنا.

أنا مش هدي نصيحة ولا حاجة ...

أنا بس هراجع  مراحل الأمومة اللي عملت حضرتك أو سيادتها  ابن أو بنت :

لو أنت  ام مخضرمة زيى .. مافيش داعى تقرأى ال post بتاع الأمومة ده لإنه بصراحه هيقلب عليكى المواجع. 

لو إنت أم جديدة أو على وشك تكونى أم، أو بنوته وأصلاً عندك إستعداد فطرى تكونى أم ...ممكن تقرأى علشان تعرفى إنتى ناويه تعملى فى نفسك إيه...
وما ترجعيش تقولى ماحدش قالى ... وقد أعذر من أنذر..

1-   خلينا نبدأ من الاول خالص ..



 فى لحظه أستقبال الباشا أو الهانم الصغيرين وهذه اللحظه ...لمعلوماتك – فهيا آلام تعادل آلام كسر (عشرين عظمة) ودى حقيقه علميه.. بس بجد أول ما تشوفى الكلبوظه هتنسى كل اللى جرالك.

2-   من  سن شهر لست شهور: ماتحاوليش تنامى....أحسنلك:
 رضعى



 وغيرى وحمى وبوسى ولبسى وقلعى وإوعى تنسى مشاوير التطعيم



وزيارة الدكتور- اللى هاتيجى بدون ميعاد  - أول ما هتشوفى الترمومترو يغمى عليكى .. يارب تكونى محظوظه وتلاقى حد يوصلك لدكتور الأطفال لإن مش هتعرفى تسوقى.

3-   من 6 شهور إلى 12 شهر: هتشوفى حاجات عمرك ما شفتيها وتحسى بحاجات تجنن: القمر هيبتسم ويقهقه من الضحك لما تلاعبيه..

    وهيصوت لو مشيتى من قدامه.

   وهيرمى الشخشيخه فى وشك على سبيل الهزار،

 ولو بتلبسى نظارة حاولى تجيبى عدسات أو أحسن تعملى ليزك لإن مش هتلاحقى على النظارات اللى بتتكسر وتتشد من وشك.

 وقصى شعرك – أو اللى باقى من شعرك – بمزاجك قبل ما هو يشده ويقطعه .

فى المرحله دى بردة هتحصل حوادث مريعه لو مش واخده بالك وعينك على الكلبوظه 24 ساعه فى اليوم.

 يعنى ممكن يتشقلب من على الكنبه وهو قاعد زى القمر..

 أو يتقلب فى سريريك وينزل زرع بصل على الأرض- لا قدر الله.

المرحله دى بردة فيها تسنين، يعنى فيها حرارة وإسهال وقريفه للصبح وفى عض للركب...لما اللولى يبدأ يبان فى بقه.

4-   فى مرحله الحبو بأة ... إمشى دايماً وأنت معاكى ال الديتول فى إيد وفوطة وMob فى الإيد الثانيه، وخليكى دايماً خطوه قدامه علشان تلحقى تنظفى الأرض و الحاجات اللى هيحطها فى بقه.

     أما لو كنت محظوظه زيادة والبيبى قرريمشى قبل الأوان...

     إجرى بسرعه وإلحقى إقفلى الحمامات،

     شيلى التحف وإنسيها قد 3،4 سنين ،

    سدى الفيش بتاعة الكهرباء لأنه هيدب صوابعه النونو فيها،

 دخلى كل الشباشب والجزم فى الجزامة وحطى عليها قفل – لإن دى مرحله قضم الشباشب

 وسمكرى البلكونات والشبابيك بالمره علشان تطمئنى لأن دى مرحلة القفز المرتفع,
أما المطبخ فإنسيه .. ما ينفعش تدخلى وهو معاكى .. ولا ينفع تدخلى وتسبيه لوحده فى حته ثانيه...عليكى بالدليفرى.

أما مرحلة من 3-5 سنين فدى معروفه عالمياً بمرحله "الرذاله المفرطه" وتلاقى البيبى اللى كان لذيذ وبيلعب معاكى ويموت فيكى وقاعد يحضن ويبوس فيكى طول النهار ، تحول بقدرة قادر لكائن غلس ورذل وكل مهمته فى الحياة يقرفك....

ويزن على كل حاجه ...ويخرب بيتك شراء لعب واللذى منه.

إرحمى نفسك ساعتين ثلاثه الصبح...  ووديه حضانه كويسه بالدولار....

 هيتعلم هناك أحلى شتيمة ويرجع يجربها فيكى.... وبكدة تبقى آخذتى جزائك إنك توديه حضانه قبل سن "الغم الرسمى" طبعاً قصدى سن المدرسة الرسمى 6 سنين.

                                                     

أحسنلك هاتيله كتب وعلميه فى البيت وأهو كده تكونى بتجهيزى نفسك علشان المراحل القادمة .... وكله عند الله...

أما باقى المراحل والمهام اللى مستنياكى هأبقى أقولك عليها بعدين علشان عندى حصه English  دلوقتى....

ومع ذلك أحلى حاجه فى الدنيا هى إنك تكونى أم ...لأحلى بيبى فى العالم

 ويا سلام كمان لو كانت بنت امورة زى نونى   أو ولد راجل زى على

 و يا سلام  لو توأم زى نونى وعلى ...أحلى ولاد فى الدنيا.

 
ملحوظة :

دي طبعا مش صورة نورا و علي. صورهم ها تشوفها في المراحل الجاية لما نوصل للمراهقة .