الشرعية بـالملوخيه

الشرعية  بـالملوخيه

شفت بعيني ماحدش قاللي

شفت  الإخوان  و هم  معسكرين  تحت  عمارتنا في جمعتين ورا بعض:

جمعة نبذ العنف و جمعة الشرعية ..

أول جمعة صحونا من الساعة ثمانية الصبح على أناشيد أطفال الإخوان وفضلوا يهرتلوا طول النهار باغاني "بيئة " من  عينة ادحرج  و اجري  يا مرسي خليك عاللكرسي  يا مرسي   و يا مرسي  ادي إشارة  واحنا  نجيب  لميس  في شكارة و البرادعي بيهيس  و عايز يبقى الريس.

و بعدين  جابوا الابطال المفوهين من المجرمين السابقين زي عاصم عبد الماجد وبدأ في   نبذ العنف : سوف  نسحق تمرد . سوف  نفرم الليبراليين  و ناكل  الشيعه و نحرق الثوار و نولع في الشعب,,,

وعشان الدنيا كانت حر

استحموا في نافورة  شارع الطيران

ناموا في  مداخل  العمارات

و سابوا منطقة رابعة العدوية –اللي هم مصرين إنها ميدان مع إن مصر كلها عارفة إنها مجرد تقاطع – سابوا  المكان  مزبلة و ركبوا الباصات و روحوا بلادهم

حاولوا يقنعونا انهم مليونية بس  على مين دي اشارة  رابعة  مع  طريق  النصر متاخدش 100 ألف..

أما الجمعه التانية بتاعة الشرعية-  اللي  مستمرة  لحد  وقت  كتابة المدونة  دي  يوم  السبت يونية 29 – فدي موضوع  تاني

بكرة كلنا نعرف إن مكانلهاش أي تلاتين لازمة!

كلنا رايحين بكرة  التحرير  و هنسيبلهم  "الميدان" بتاعهم  يشبعوا بيه و يكملوا  الشرعيه بـالملوخيه!

بكره

بكره

بكره الولاد يكبروا وأرتاح ،

 بكره أخلص االدكتوراه وأعيش،

بكره تخلص الاعاره ونرتاح،  

بكره يتخرجوا من الجامعه ونبطل قلق، بكره يتجوزا ويستقلوا.

 بكره! بكره! بكره!

كل حاجه بكره…..

طيب ايه أخبار النهارده …ليه النهارده على طول مش مهم؟

كأنه مرحله متوسطه لازم تخلص وتخلص بأى شكل وأنا تعبانه وعيانه وزهقانه وقرفانه.

 ليه النهارده مايكونش فيه بهجه، مش هأقول سعاده علشان دي كلمه كبيرة قوى ولا حتى بكره.

لازم كل يوم يكون فيه حاجة مبهجة ولو من نوع بسيط ..

يعنى لحظه استمتاع  بضحكه من القلب

 أو مكالمه صديقة خفيفه الظل... أو حتى كبايه شاى بمزاج

 زى الأجانب يعنى لازم نفصل.

 أنا طول عمرى زى القطر مابعرفش أفصل ,,, وبأخذ فى وشى لحد المحطه وبعد المحطه مابقفش آخذ نفس وأجرى على المحطه اللى بعدها.

والله حتى وأنا عيله كنت بذاكر زى الحمارة لحد لما بابا يجى ويقولى لازم تنامى . هى طبيعة شخصيتى بس مش قادرة أكمل كدة .

أدينى واخدة أجازة والمفروض أنى قاعدة فى البيت مروقة والحمد لله عاملة إنجازات فى حياتى وحياة عيلتى مش بطالة أبداً بس ليه مش عارفه استمتع بالوقت دة اللى مفروض يكون لذيذ وبدون أعباء.

نفسى أحس بالراحة الحقيقية وأستمتع بوقتى وأنا فاضية.

 طيب ما أنا عمرى ما بأكون فاضية. دايماً بأعمل حاجة مع العيال، فى البيت أو حتى فى دماغى اللى عايزة كسرها. هى دى الطريقة الوحيدة علشان أفصل. نفسى ما أحملش الهم ولاأستنى  بكرة  عشان  أعيش .  سامعة

 بلاش  نستنى  بكرة  لما  أحوال مصر  تستقر. خلينا  نحاول  نعيش  النهارده  ونسيب  بكرة  على  الله مادام  بنعمل  اللي  علينا بص حواليك فى مصر وانت تعرف.

 اللهم أنى اعوذ بك من الهم والحزن 

اللهم أنى اعوذ بك من الجبن والبخل 

اللهم أنى اعوذ بك من العجز والكسل 

اللهم أنى اعوذ بك غلبة الدين وقهر الرجال