كراكيب نفسية

كراكيب نفسية

عارفين البلكونات وأوض السندرة والمخازن والسطوح اللى مش موجودة فى أى حتة فى العالم غير عندنا فى مصر؟

عارفين لما إحنا بنخزن كل حاجة حتى وهى غير صالحة لأى إستخدام على أمل إن إحنا نعوزها أو نحتاجها فى أى وقت ؟ الوقت دة عمره ما بيجى... وتلاقى البلكونة مليانة حلل قديمة ورجل الكرسى المكسورة من 20 سنة والبرطمانات الفاضية اللى كانت الستات زمان بتعمل فيها مربى قبل ما يخترعوا فيتراك ومخلل قبل ما يخترعوا spinney  و Metro Mercato.

 هتلاقى فيها كمان كتب دراسية من لما العيال كانوا فى أولى إبتدائى وكتب التوجيهية (الثانوية العامة القديمة) وكتاب التشريح والفسيولوجى بتاع الدكتور لما كان فى إعدادى طب وكتاب الخرسانة بتاع الباشمهندس فى إعدادى هندسة.

 حاجات كتير زى دى بنركنها وننساها وبنكوم عليها التراب وتجيب حشرات وبلاوى وبردة كمصرين بنحتفظ بيها لحسن فى يوم نحتاجها.

ليه إحنا بنعمل كدة؟ 
ليه العيال الصغيرة ما بترضاش تتخلص من اللعب المكسرة والعرايس اللى من غير رأس ولارجل ...؟
و ليه الستات بتحتفظ بجزم العيال القديمة أو لبسهم اللى ما بقاش موضة من أيام الستينيات؟
 ليه بجد بنعمل كده؟

لأن الحاجات دى بتحسسنا بالأمان. الحاجات دى بتكون مرتبطة فى ذهننا بذكريات حلوه أو مره، بشخص عزيز ما بقاش موجود أو بحالة معينة عشناها زمان و مش قادرين نوصل لها دلوقتى.

 جزء من تكوينا النفسى بيقول إننا لو اتخلينا عن الكراكيب المكومة فى البلكونة هنكون فى نفس الوقت بنتخلص من الذكريات الجميلة أو اللحظات الممتعة أو حتى الأشخاص الغاليين علينا. مع إن ده طبعاً ليس له علاقه بالحقيقة.

بالعكس... ده إحنا لما بنتخلص منها بنوسع مكان مش بس فى البلكونة أو السطوح أو السندرة – لأ دة كمان فى نفوسنا وقلوبنا لحاجات جديدة fresh  ------------- من غير أى تراكمات للماضى.

سامعة طنط بثينة بتقولى:

- طب وإيه يعنى الضرر لو سبت كل حاجة زى ما هى فى البلكونة وجبت حاجات جديدة كمان؟
 ولا هم يعنى شوية كتب علم النفس بتاعتك لازم تطلعيها علينا؟

-لأ يا طنط. ... ما ينفعش تجيبى حاجات جديدة قبل ما ترمى كراكيبك اللى فى البلكونة أو تبعتيها أي جمعية خيرية يمكن حد يستفيد منها.

-ليه يا ست الفيلسوفة؟

-أولاً لإنها بتطلع عينك كل أسبوع فى التنظيف وتقعدى تغطيها بملاية قديمة وتشوهى منظر البلكونة...

ثانياً لإن الحاجات الجديدة بردة مصيرها للبلكونة وبعد كام سنة مش هتلاقى حته تقعدى فيها.

طبعاً يا طنط أنا بهزر معاكى... مش قصدى خالص الكراكيب فى حد ذاتها مع إنها لازم بردة نخلص منها....

 أنا قصدى الكراكيب اللى جوانا. 
أيوة اللي متكومة جوة عقولنا و نفوسنا...

عارفة لما يكون فى أوضة منعكشة وكل حاجة مش محطوطة فى مكانها؟ 

يعنى الشلت متكومة على كنبة واحدة, وطبق قشر اللب مدلوق على الأرض , وجرنال السنة اللى قبل اللى فاتت مفتوح على الكرسى المذهب , ولمبة الأباجورة اللى إتحرقت لسه ما حدش رماها وحط غيرها من سنة.

إية رأيك فى المنظر ده؟

- منظر الزبالة ولا مؤاخذة ....الست اللى بيتها كدة تبقى عفشة يا فيلسوفة العيلة!

-أهو إحنا بنبقى بردة عاملين كده من جوة لما نصرإننا نخزن كل حاجة جوانا.

يعنى نفضل نفكر نفسنا بيوم الخناقة مع طنط نادية على بلاج مرسى مطروح سنة 1970 وإزاى الواد خالد إبنها – قليل الأدب اللى مترباش – حدف الرمل فى عين وشعر بنت عمته ساميه والبنت إتقهرت من العياط، ومامتها طلعت عينها على ما نظفت الرمل من شعرها.
 ونفضل نحكى ونتحاكى على الموضوع لحد ما طنط نادية تقطع علاقتها بطنط ساميه وكل واحدة تحرض جوزها على جوز الثانية.

هى دى الكراكيب النفسية اللى لأزم نتخلص منها وبسرعة ونستغل الاعياد علشان نصالح اللى خاصمناهم ونسامح وننسى كل الأسية بتاعة زمان.

إرمى ورا ظهرك كل حاجة
كل الكراكيب و الأحقاد التافهة
كل الزعل من القريب و البعيد

وإفتكر بس إن الدنيا قصيرة وإن ممكن العيد ده يكون إخرعيد لأى حد فينا.... لا قدر الله,

لازم ننظف جوانا زى تنظيفة العيد بتاعة نينة زمان و لما كانت بتغسل السجاجيد والحيطان والستاير والإبواب وسلم العمارة علشان كل حاجة تعيد وهى نظيفة.

بذمتكوا إيه الأولى ينظف على العيد الكراكيب اللى جوه ولا اللى بره؟

مستنية رأيكو وكل سنة وأنتم بألف خير...

سلاحف النينجا

سلاحف النينجا

عندنا سلاحف مائية صغيرة.. . اللى عبد الله هايكلها فى الصوره الى فوق!!!

 دى مش أول مرة نربى سلاحف أو pets  عموماً .

يعنى كان عندنا عصافير زمان...
كان عبد الله بيشتريهم ويطيرهم لما يصعبوا عليه .

ومرة وهو راجع من رحلة مع المدرسة لاقيته جايبلى هدية حيه .. فار من فصيلة الخنازير اسمه جينى بيج
وكنت عايزة أرمية من البلكونه هو والفأر   اللى كان شارية وحاطة فى صندوق كرتون وجاى بكل فخر واعتزاز يفرحنى بالزائر الجديد .

 بس الحمد لله, تانى يوم لقينا الضيف الثقيل إنتقل الى العالم الآخر فى الصندوق...  وطبعاً عملنا له جنازة مهيبة :

 عبد الله نزل قدام العمارة وجمع اخواته وأصحابه وعملوا حفرة تليق بالمرحوم ثم وارووه التراب....
 مع الدموع الحارة . ربنا يجعله آخر الأحزان وكله بيتنسى ...

ونقلنا من مرحلة الطيور والفيران  لمرحلة الحيوانات المائية.
 بدأنا بالسمك بأنواعه وياما كنا بنشد عليه السيفون لما يفطس فى الحوض بتاعه علشان نبقى عملنا الواجب ودفناه فى بيئته الطبيعيه... و يبقى رجع للنهر الخالد.

المهم... حد  إبن حلال شار علينا بالمرحلة النهائية :

الكائنات البرمائية الخضراء.. على أساس إنها متينة وبتعيش ومش عايزه مجهود جبار فى العناية والتنظيف .

وللإحتياط قررنا نوزع المهام بعدالة متناهيه فكان التقسيم كالأتى:

-عبد الله ياكل الزلاحف وهو مسميها هالك وأحمر الودان على أساس إن فيهم واحد مفترى وممكن يأكل كل دقيقة مع إنهم مفروض يأكلوا مرة واحدة كل يوم.

- نورا: عليها التنظيف يعنى كل يوم فى نهاية الأكل تأخذ السلاحف اللى هى مسمياها : عصام وهبه ... وتحميهم وتدعكهم بفرشة الاسنان... وبعدين تغسل البحيرة (الطبق) بتاعهم و تحطلهم ميه من الفلتر.

- طبعا انا مهمتى هايفه ...و غير معلنة ...ومالهاش علاقه بالموضوع اصلا:

 تنضيف الحمام بعد ما نورا تزروطه وهى بتديهم ال shower بتاعهم!
الملك على

 أما فهو عليه يلاعب الفريق ...
 شفتوا العدل!
زى العدالة الاجتماعيه اللى فى البلد كلها! -

وصفات مجربة

وصفات مجربة

-       وصفات إيه بس.
 هو إحنا ناقصين أكل.... دى برامج التليفزيون هاريانا أكل صينى على هندى على موزمبيقى.... والنبى بلاش وصفات .

-         مين قال إنى هأكتب وصفات أكل ، هو ما فيش صبر؟

-         ما أعرفش أهو أول ما كلمه وصفة تتقال يجى فى بالنا الأكل أو ساعات وصفات التجميل بتاعة أمينة شلباية وإخواتها .

-         ولا دى كمان .... تجميل إيه ... هو أنا بتاعة الحاجات دى ؟  دى وصفة علاجية

-         للبرد يعنى ولا إيه ؟

-         يا ستى أصبرى عليا ، دى وصفة للصباحات الشتوية أو الخريفية ...
لما تلاقى نفسك عايزه ما تقوميش من السرير ولا تعملى أى حاجة فى الحياة .
لما تصحى على شواكيش بتضرب على نافوخك وسيخ محمى داخل من صرصور ودنك اليمين وطالع من الناحية الشمال.... ومكهرب المجال المغناطيس اللى إنتى عايشة فيه كله .

وياسلام بأه لو كان بيصاحبة شوالين رمل وشوالين ملح – واحد من كل نوع كابس على كتافك ورقبتك .

-         الله يرحم ال magical mornings  بتاعتك ...هى راحت فين ؟

-         يا بنتى هى الدنيا كده مرة حلوة و 500 مرة صعبة . يعنى ال magical mornings   دى بتحصل كل فين وفين . أمال إيه مش سحرية ؟ خلينا بأه فى الوصفات اللى ممكن تقلب صباح الشواكيش والرمل لصباح سحرى أو شبه سحرى .

-         عادى يعنى : إثنين بنادول على 4 ، 5 فناجين قهوة والدنيا تمشى .
ما هو أنتى  ها تصحى  يعنى هاتصحى لإن فى ناس رايحة المدرسة ولو ما صحيتهمش مش هيقوموا ... وناس ثانية عندها شغل بردة مش هيروحوا!

-         لأ .... دى حلول تقليدية ، أنا با تكلم على وصفات نفسية  تغير مزاجك بجد من غير أدوية ولا قهوة :

ألبوم الصور

-         أى صور دى اللى هتعالج الصداع والروماتيزم المزمن ؟

-         أى صور من حقبه زمنية قديمة حبتين ، يعنى صورك مع عيلتك وإنتى صغيرة وسعيدة أيام المصيف مثلاً ، لما كانت الناس بتروح رأس البر ، قبل ما يخترعوا مارينا والساحل.

-         ما لها يعنى الصور دى ؟

-         تعالى إتفرجى معايا وإنتى تعرفى....

-          أمتدت قعدة الصور ساعتين وإحنا بنقلب الصور القديمة والأماكن الجميلة ونضحك على مناظرنا وإحنا سود متفحمين لأن كريمات sun block  كانت شاحة فى الزمن ده .

-         إنتو مين لا مؤاخذه الى قاعدين مع بعض؟

-         أنا ونفسى .... ما هو لازم كل شوية الواحد يكلم نفسه ويشحنها بذكريات جميلة من ألبوم الصور . 

قطة هديل

قطة هديل

هديل بنوتة لذيذة بتموت فى القطط , وهى البنت الوحيدة فى العيلة اللى إنتصرت فى صراعها من أجل القطط وقدرت تحقق حلمها وجابت قطة شيرازى جميلة زيها و سمتها Ritchie  . لكن تأتى الرياح بما لا تشتهى السفن .

-         " إيه تاتى الرياح بما لا تشتهى السفن " دية ؟

-         دى حاجة بنقولها لما نكون عايزين حاجة ويحصل عكسها .

-         ترجمى يا ماما ، يعنى إيه برده وإيه علاقة ده بهديل ؟

-         هديل لما جابت القطة كانت فاكره إنها هتقضى معاها وقت لذيذ ويقعدوا هما الإثنين على الكنبة قدام التليفزيون يلعبوا سواء فى هدوء ودلع ، وخصوصاً إن هدوله نفسها شبه القطط وهادية بطبيعتها .

-         أمال إيه اللى حصل ؟

-         هديل رجعت من المدرسة ثانى يوم بعد ما جابت القطة وفضلت تدور عليها فى البيت كله فى أوضنها ، تحت السرير ، فى المطبخ ، فى الليفينج أبداً .... فص ملح وداب .

-         وفجأة ظهرت " جنى "  القزعة ...أخت هديل الصغيرة ، شقية ومفترية ومش باينة من الأرض وبتتحرك فى البيت بسرعة الصاروخ المنطلق ومش سايبة حاجة فى مكانها .

طبعا أكثر واحده بتعانى من  جنى فى البيت هى هديل ... لأنها مش ملاحقة تخبى الكتب ولا الهدوم و لا الجزم بتاعتها من جنا المفترية .

أول ما جنا شافت هديل بتدور على القطة تطوعت بالمعلومات والمساعدة وراحت قايلة بأعلى صوت:

-أته باع

-يعنى إيه "أته باع"

-يعنى القطة ضاعت

طبعا هديل سمعت الكلمتين دول وإتجننت لإنها عرفت إن جنا القزعة عندها معلومات خطيرة عن القطة و متورطة فى إختفائها أو خنقها,  خصوصاً إنها طول النهار بتعذب فيها وما سكاها من ديلها بتلعب بيها.

بس هديل قررت تمسك أعصابها وتشيل جنا على حجرها علشان تفهم إيه اللى حصل للقطة.

جنونة، فين القطة، يلا نجيبها هى فين ؟ جنا طبعا لئيمة وفاهمة كل حاجة بس عماله تستعبط لحد ما هديل تطلع كل البونبونى والشكولاتة اللى معاها.

وبعد ما كلت الشكولاتة ولزقت الليفينج بالبنبونى ومسحت إيدها فى شعر هديل راحت نازله من على رجل إختها وإتجهت إلى المطبخ.

-"قطة باع"

-يا بنتى إرحمينى، القطة ضاع فين؟

راحت جنا جارية ناحية الثلاجة وفضلت تتشعبط  فى هديل علشان تفتحها.

-يا بنتى مش وقت طفاسة، أنا لسة مدياكى شكولاته وبنبونى ..... لكن أبدا، جنا فضلت متسمرة قدام الثلاجة ومصرة إن هديل تفتحها.

مفاجأة...... أول ما هديل فتحت الثلاجة سمعت صوت ضعيف "مواء" إستغاثة.

يا نهارك أسود يا جنا، القطة فين؟    أنا سامعة صوتها فى الثلاجة بس مش لاقيها.

جنا القرده  راحت فاتحة درج الخضار (لإنه تحت خالص) و Voila...

قطة هديل قاعدة ياعينى منكمشة وغلبانه فوق الطماطم والخيار والظاهر إنها بقالها  كثير مثلجة لإنها مش قادره حتى تخرج من الدرج بعد ما إتفتح .

فى اليوم ده هديل قررت تتبرع بالقطة لأى حد من أصحابها معندهاش أخت صغيرة!!

 لإنها فعلا بتحب القطط قررت ترحمها من جنا الشقية.

لو كان بيننا الحبيب

لو كان بيننا الحبيب محمد صلى الله عليه وسلم

ده عنوان برنامج على MBC 1 برنامج - زى ما العنوان بيوحى – يستدعى وجود الرسول صلى الله عليه وسلم بيننا فى الوقت الحاضر ويخمن انطباعاته عما يحدث فى زماننا.

بمعنى أوضح:  البرنامج مبنى على فكرة  "لو"... فكرة إفتراضية بسيطة جداً بس فعلاً مؤثرة. إنك تستدعى وجود النبى عليه الصلاة والسلام فى كل موقف فى حياتك اليومية وتعرف رد فعله على الحاجات دى هيكون إيه.

 البرنامج – يقدمة شاب – سعودى أسمة محمد الشقيرى – يقدم مشاهد  حصلت فعلا من حياتنا اليومية ويحاول أستنباط رد فعل الرسول عليه الصلاة والسلام على هذه الأحداث.

المواقف أحيانا سلبية – حاجات بسيطة يعنى بس ما لهاش علاقة بأخلاق الإسلام زى الإهمال فى النظافة، وتضييع الوقت فى حاجات تافهه، وسوء معاملة الناس لبعض. طبعاً النبى عليه الصلاة والسلام لو شاف الحاجات دى  هيزعل ... ما افتكرش حد مسلم ممكن يفكر يعمل اي حاجه يزعل منها النبى صلى الله عليه وسلم.

طبعاً كل حاجة واضحة, بسيطة، كل حاجة حلوة، مبهجة، نظيفة، طيبة، متسامحة أو جميلة هتعجبة وتبسطة عليه الصلاة والسلام,  زى ما كل إهمال أو قذارة أو بذاءة أو شر هيئذيه ويضايقة.

بس فى كمان مواقف إيجابية جميلة جداً زى حلقة عن مسجد الكوثر وهو مبنى بجهود أهلية وحالة رائعة من الرقى والنظافة والجمال وأكيد أكيد الرسول عليه الصلاه والسلام لو شافه هيكون سعيد بيه .

أد إيه الفكرة بسيطة وأد إيه العائد كبير ومؤثر لو استحضرنا وجود النبى صلى الله عليه وسلم.. معانا فى كل لحظه و حاولنا نرضيه باتباع سنته.

برنامج بجد حلو. أوعوا تفوتوه.

اللهم صلى على محمد وعلى آله وصحبة وسلم

اللهم صلى على سيدنا محمد  صلاة اهل السماوات و الاراضين

و اجر يا مولانا لطفك الخفى فى امرى

و ارنى سر جميل صنعك فيما امله يارب العالمين

قولوا امين

1.