نورا و على فى الأدغال

نورا و على فى الأدغال

-انا عايزه اسافر لوحدى... اشمعنى على و عبد الله!

-تسافرى لوحدك ازاى يعنى...
- انا اصلا مش موافقه انك تسافرى مع اخوكى!

-ليييه يعنى ... هسافر يعنى هسافر... ماليش دعوه..

الحوار ده بقاله شهرين شغال فى البيت 

و كل يوم ينتهى بخناقه

الله يخرب بيت السفر... على بيت ايزك و اللى اخترعوها!

قال ايه نورا عايزه تسافر لوحدها اخر الدنيا و هي لو دخلت المطبخ و لقت نمله ماشيه بتصوط و تطلع تجرى وتنادى علينا ننقذها من الوحش!

امال لو راحت كينيا و لا جنوب افريقيا و طلع لها اسد هاتعمل ايه؟؟

وحتى على... انا مش موافقه يسافر!

دا اخر توهان!

هما الاتنين ماينفعش يسافروا اصلا!

احنا اخر مره رحنا السخنه نسيو شنطتهم فى البيت و مااكتشفوش الا بعد ماوصلنا !!!

مافيش سفر يعنى ما فيش سفر!!

يانا ياانتو بقه... و مافيش سفر الساحل حتى!

...مش افريقيا و الهبل ده !

اللى يسمع الكلام ده طبعا يفتكر انى أم جامده جدا و مسيطره و ماعنديش تفاهم

مايعرفش انى بعد شويه هاضطر اوافق من كتر الزن و الالحاح و الرخامه و الرزاله

بس طبعا يسافرو سوا ....

اهه يونسوا بعض و ربنا يستر 

وانا اقعد هنا اكل فى نفسى لحد مايرجعو بالسلامه...