جوجو الشهيره بسوشى

                            

بعد صولات و جولات من المداولات فى البيت

وبعد اعوام من الحروب الباره و الساخنه

بين جبهه الرفض و المقاطعه ( انا و محمد

وجبهه الاصرار و الرزاله بزعامه عبد الله و دعم و تشجيع على و نورا

انتصرت الجبهه الثانيه و اثبتت ان الام و الاب فى البيت دايما على خطأ و إن العيال دايما عندهم حق

آه.... معلش أنا اصلا نسيت أقولكم الحرب كانت على ايه

الأول كانت على كلب

وبعدين لما أدركو إن كونا نجيب كلب يعيش معانا فى البيت ده موضوع مش هيحصل

غيروا الإستراتيحيه الحربيه و بدأوا يزنوا على قطه

أنا الحقيقه الجبهه بتاعتى حصل فيها انشقاق و  كالعده انفصال لأن محمد باعنى و انضم معاهم!!

أنا طول عمرى بخاف و بقرف من القطط

داغير إن ماعنديش استعداد اتحمل مسئوليه كائن حى جديد غير الكائنات المفترسه اللى عايشيين معايا اصلا

طبعا انا فضلت صامده و راسخه على جبهه الرفض لوحدى لحد مالقيت عبد الله داخل علينا بكوره فرو صغيوره طالعلها عينين كبار

وبدا الهرج و المرج 

و انعقد اجتماع طارئ و اسفرت المفاوضات الديموقراطيه عن التصويت

و كالعاده برده

خسرت خساره منقطعه النظير و انا الوحيده الى صوتت بلا فى استفتاء القطه

بس انا برده مش سهله

قلت لهم هيكون فى شروط و عقوبات اقتصاديه و معنويه لو القطه دى خرجت من باب اوضتكم او لمحتها بتتجول فى انحاء الشقه.

و هتكونوا مسئوليين مسؤليه تامه عن أكلها و شربها. 

وطبعا التنضيف و التواليت و الذى منه

الحقيقه ولادى متعاونين جدا ووخدونى على قد عقلى و على البركه

بقى عندهم قطة

وبدأت مفاوضات اختيار الإسم
.......
بكره بقه عشان القطه بتنادى عليا و مش هاقدر اتأخر عليها