بما إن عبد الله هوا اللى جاب القطه، الجميع ماقدروش يفتحوا بقهم لما قرر يسميها مايكل جوردن!!!
مع إماحدش طبعا مقتنع ان الاسم بتاع العملاق ده يناسب الكتكوته الصغيوره.... خصوصا انها كمان بنوته ورقيقه خالص
إسم تقيل و رزل بس عبد الله طيب و بعد شويه سمحلنا نناديلها جوجو
قلنا كويس، نص العما و لا العما كله .....و لو ان شكلها مش جوجو خالص
دى نونو و مرعوبه و لسه سايبه مامتها و اخوها التوأم
وتستاهل اسم الذ من كده بس اوك....
طبعا يومين تلاته بعد ماعبد الله جابها راح مسافر و سايبهالنا... طفله بريئه
هنا بقه استفرد بيها على و نورا
هى بتحب على جدا و تلحس و دانه و تنام جنبه على سريره
هو على الى شجعها على الشقاوه و قفز الحواجز و بدأت احس ان فيها جينات حصان.
و بدأ على يناديلها سوشى وهكذا بقت شهيره بهذا الإسم و لو إنه برده مش لايق عليها
نورا كمان قامت بالواجب..
استغلت غياب عبد الله أسوأ استغلال
كانت بتعامل سوشى على انها بنتها
بتاكلها
وتشيلها طول النهار
و تنام جنبها و على مسافر
وأهم حاجه.....
و تغطى على الهدايا الى كانت بتعملها فى البيت قبل ماتتعود على التواليت بتاعها
طبعا انا كنت عارفه و مطنشه...بمزاجى
يعنى بصراحه القطه بيبى و من غير ام
وحتى عبد الله ابوها بالتبنى مش موجود فى مصر
وعمها على مسافر كمان
فمش هابقى انا و الزمن عليها
و بعد مانورا الخبيثه لاحظت انها صعبت عليا ...
بدات تخرج بيها من الاوضه الى كانت حابسه نفسها فيها
مره تجيبها المطبخ وتقعد ترغى معايا وهيا شايلاها
و مره تقعد معانا فى الليفينج
و فضلت تدحلب حبه ...بحبه ...لحد ماخلتنى فى يوم ألمسها...
انا الى طول عمرى بقرف من القطط لقيت نفسى باتلكك عشان ألمسها من بعيد لبعيد
و مره فى مره شلتها...
بجد انعم و ادفى مخلوق فى الدنيا....
و ريحتها فكرتنى بريحه العيال لما كانوا بيبى...
ايه ده؟؟
تعالوا بسرعه!!
الحقوا بسرعه شوفوا ماما بتعمل إيه؟؟
انا "قفشت" ماما وهى بتبوس جوجو و بتكلمها كإنها بيبى!!!!
وعند هذه اللحظه اللى نورا فضحتنى فيها ... اضطريت اعترف للجميع إنى بموت فى جوجو
وبدإت صورى انا وجوجى فى حضنى تغزوا الواتس اب و تتبعت لعبد الله وهوا مسافر وهوا مش مصدق الى بيتبعتله ده
كان فاكره فوتوشوب!!
من اليوم ده بالظبط
الجميع رفع ايده عن جوجو و بقت مسؤله منى اوحدى
بس برده أنا مش ندمانه
اتصح ان جوجو عسوله و لذيذه و بقيت بازعل لما تنام
وبما إن الجميع مشغوليين و عاملين البيت لوكانده
أنا وجوجو بنقضى معظم وقتنا سوا
وبقينا "بست فريندز"...
بالغيظه فى نورا...
ليست هناك تعليقات:
إرسال تعليق