Prom Mania

 

Prom Mania

 

 

 

من العادات الى انتشرت فى مدارسنا مؤخرا حفلات التخرج و بيدلعوها و يقولوا عليها بروم.

من معلوماتي المتواضعة كست مخضرمه في التعليم ان دى حفله بتتعمل لما نتخرج، وبتكون بالنهار، و بنعزم فيها الاهل الى طلعت عينهم معانا طول سنين الدراسه. و عادة بنلبس لبس انيق و عليه روب التخرج.

لكن للاسف السنه دى اكتشفت ان كل معلوماتى غلط و ان التخرج له معنى جديد.

كلمة ،بروم نفسها معناها حفل راقص و و مالهاش اى دعوه مباشره بالتخرج!

لكن طبعا احنا لما بنقلد حد لازم نحط ال 'تتش' المصرى بتاعنا و نزود حته من عندنا.

 وبما انى متعوده اشتكيلكوا من التوام الذيذ نورا و على

 وبما انى مش قادره استحمل اكتر من كده قلت 'افش غلى فيكم' قبل ما يحصلى مضاعفات اكتر من التخلف العقلى و العته المنغولى الى ان عايشه فيهم من اول السنه الدراسيه.

عايزه بس افكركوا ان على و نورا في الوقت الحالى –و انا طبعا و كل العيله معاهم- محشورين فى عنق الزجاجه المشهوره بالثانويه العامه.

المفروض ان الواحد لما يكون محبوس فى حته يحاول يفلفص و يخرج منها و بعدين يبقى يحتفل.

  لكن احنا بقه فى مدارسنا بنحتفل الاول و نعمل ال "بروم" و بعدين ربنا يستر و نتخرج من ث ع.

الموضوع ده محيرنى و حاولت اعمل اى حاجه علشان يقتنعوا ان التخرج الاول بس مافيش فايده.

المهم لما فشلت معاهم هم و اصحابهم قلت ابحث فى الاصل الغوى للتخرج و اعرف ايه علاقته بالزفت ال "بروم"  و طبعا ما وصلتش لاى نتيجه لان انا نفسى مشغوله بتحضيرات الحفله.  فعندى كام سؤال نفسى حد يجاوب عليهم:

  

اولا:  لييييييه ال بروم الى بقى معناه التخرج بيتعمل قبل ما العيال تتخرج، لا و الذ من كده قبل الامتحان اصلا؟

ثانيا: لييييييييييه التوقيت بيكون في اخر شهرين تلاته قبل الامتحان يعنى عز المذاكره و التركيز؟

وطبعا الموضوع مش بيبقى على اد يوم الحفله الى مدتها قصيره جدا ، يادوب من المغرب للفجر !

 

 استعدادات البنات للحفله من فستان و تالون و مكياج و اكسسوارات و الذى منه بتاخد اسابيع و شهور.

 

طبعا كل واحده فيهم منشنه على لقب و لازم تعمل اقصى استعداد علشان تاخده.

الفستان لازم يكون تحفه غير مسبوقه ، حاجه تليق ’بال ريد كاربت‘

’ال هيلز، نفس درجة التطريز.

الشعر و الماكياج احدث حاجه فى اخر اوسكار
طيعا الحاجات دى بتدخل فى اسابيع و شهور و الاف الجنيهات و الخناقات لحد ما تجهز !

و بالنسبه للشباب بصراحه الموضوع اهون كتير لان كل الدفعه بتروح تجيب بدل سوداء "سوبر سليم" من عند "زارا" و قمصان بيضاء و ببيون و بيبقوا كلهم-ما عدا على طبعا- لابسين يونيفورم.

ده طبعا بالنسبه للاستعدات العامه فى كل بيت.

اما لو انتى ام اسعدها الزمان ان يكون ابنها او بنتها من المنظمين للحدث العظيم فاستعوضى ربنا فى السنه كلها لان عندهم مسؤليات اهم من الثانويه العامه او اى شهاده موازيه.

خدى مثلا اختيار الفندق الى لازم يكون احسن و افخم من الفندق بتاع الدفعه الى فاتت

كده هندور و نعاين  3‘4 فنادق و نختار افخم قاعه

بعدين بقه نشوف مين الى هايعملنا الديكور و الاضاءه

و بعدين نشوف شركه منظمه علشان تخلص كل حاجه لان الوقت بيخلص و مش هنلحق.

اما اختيار الفرقه الى هاتحى الحفله فدا موضوع تانى

نص الدفعه عايزه اوكا و اورتيجا و النص التانى عايز مدفعجيه (اه والله العظيم دى اسامى فرق! )

  طبعا!voting  الحل ايه

بعد كده نقدر نحدد الفرقه و نحسب التكاليف و سعر التذكره

ونجمع الفلوس

و نحضر الدعوات بتاعة المدرسين المحظوظين الى هانعزمهم

باقى حاجه واحده بس وهى اهم حاجه فى الموضوع

Titles

مين هاتاخد كوين و مين تستاهل برينييس و مين بست دريس

طبعا المواضيع المحرجه دى بتعمل حزازيات جامده فى نفوس البنات وممكن الجوازه –قصدى ال بروم- كله يتفركش لو واحده فيهم فقدت السيطره على اعصابها و جابت صاحبتها من شعرها المعمول لانها شايفا نفسها احق باللقب ده!

اما انا كام على و نونى فانا مطمنه و واثقه من بنتى و ابنى و عارفه ان مش هيفرق معاهم اى لقب بعد ما انا اديتهم لقب احسن توام فى العالم،

ادعوا معايا ال بروم يخلص على خير قبل ما انا روحى تطلع!

و ادعوا لكل طلبة ث ع  يتخرجوا بجد و باحسن درجات.

اميييين يارب.