الأكل تححححفة

رجعت جري من  المطار على المطبخ

لسة لابسة  الطرحة
   رميت شنطتي  على  الرخامة و انطلقت على الفريزر  اشوف  في اية جاهز  على  الطبخ

بقالي أسبوع مسافرة و كنت  طبعا مجهزالهم حاجات كتير تتعمل بسرعة

كل حاجه في  مكانها  بحطة ايدي

طبعا ماحدش عبر اكلي و قضوها  دليفري

لكن أنا  ولا  همني

شمرت و طبخت بأقصى  سرعة

فطست من الحر و الفرن

وضبط السفرة وانا سعيدة جدا بإنجازتي في عالم المطبخ

 و قدراتي الفذة في اعداد وجبة كاملة صحية في  أقَل من ساعة.

ناديت عليهم وانا كلي فخر:

يلا يانوني...

يلا يا علي...

يا عبد  الله يلا...

 الاكل هيبرد

ولا حياة لمن تنادي

كل واحد ماسكلي موبايل أو لاب توب و منهمك  فيه  

وبما  اني أم  زنانة و لحوحه ماسبتهمش الا لما  سابوا اللي  بيعملوه و قاموا على السفرة

طبعا أنا مستنية   الله... ايه  الأكل  اللذيذ ده

أو واحشنى  أكل البيت  يا ماما!

أو ياه  أنا  كان نفسي   في رز و خضار  و ستيك!

أو تسلم  الايادي !

لكن للاسف  سمعوني كلام  تاني  من  نوعية:

 ياه يا ماما  ايه اللي دخلك المطبخ وانتي لسة راجعه من السفر؟

أنتي غاوية فرهدة ليه؟

ماله الدليفري يعني ؟

الوحيدة اللي نصفتني كانت نورا:  الله يا ماما الأكل تححححفة!

 …مش قلتلكم أنا ماليش  حد غير نوني ترفع  معنوياتي!