سفر سفر سفر
قلبى بيوجعنى من السفر
مع كل تفصيلة فى السفر فى حاجة جوايه بتوجع
جزء صغير بيتكسر
شوكه بتنغرز و ما تطلعش تانى
مع كل تذكرة تتأكد
مع كل شنطه بتتوضب
مع كل بوردينج بيتقطع
مع كل جواز بيتختم
وكل بوابة بنعديها و تفصلنا عن اللى بيوصلنا
حاجه صغيره جوا قلبى بتنكمش
و تفضل تئن
و تفضل تئن
زى بيبى صغير امه سابته ومش لاقى حد يرعاه
حتى قبل السفر جسمى كله بيعبر بطريقته عن القلق
الصداع بيبقى له شكل تانى
و العضلات المشدوده بتتصلب اكتر
و الألم بينتشر و حدته بتزيد
زمان و انا صغيرة جدتى كانت دايما تقولى انتى هاتسافري
كتير...
و السبب مضحك بجد
كل ما اقلع شبشيى قبل ما اطلع على السرير جنبها علشان
تحكيلى حدوته تلاقى فردة راكبة على
التانيه
و ده معناه انى هأركب طيارات كتير
ساعتها كنت عايزة اطلع مضيفة طيران حتى قبل ما أركب
طيارة او اشوف مطار
على اساس ان دى اسهل طريقة للسفر
ساعتها السفر كان امنية و حلم
و بعدين اتحول لكابوس
زى مايكون اتكتب عليا طول العمر
السفر بقى جزء من حياتى و حياة كل الى باحبهم
و انا عندى خمس سنين بابا سافر لوحده
ساعتها كرهت السفر
بقى زى العدو اللدود
بقى زى العدو اللدود
بعدها بشوية سافرنا معاه
طول السنه مسافرين و نرجع في الصيف علشان نسافر تانى
كرهت السفر اكتر
مشاعر موجعه ان طفل يسيب بيته و مدرسته و اصحابه و يسافر
بلد غريبه
وكبرنا بس برده السفر لسه بيوجع
خصوصا لو حياتك كلها مبنيه على فكرة السفر
دراسه .... شغل.... سياحة
سفرى
سفر جوزى
سفر ابنى
حتى لما بنسافر كلنا سوا فسحه
برده نفس الاعراض بتيجى
كله سفر
كله وجع قلب
حته منك بتنخلع و يفضل مكانها فاضى
يئن و يوجع و يزن زى وجع الاسنان
لحد ما اللى سافر يرجع بالسلامه...
عندك حق في كل كلمه ربنا معكي ويطمن قلبك دايما علي كل حبيب يسافر ويرجعولك بالسﻻمه علي طول يارب ماتشوفي اي حاجه وحشه ابدا
ردحذف