أم ولاء
كل سنة و أنتم طيبين
النهارده عيد العمال
عيد كل شعب مصر الشقيان المكافح الشجاع...
طبعا أنتم عارفين إني متحيزة للستات بإعتباري انتمي لهذا الحزب المناضل جوه البيت و براه.
الأمهات الجامدين جدا اللي بيصحوا الفجر يحضروا ليوم شاق.
النهاردة في … عيد العمال عندي واحدة
عزيزة عندي نفسي أقولها كل سنة وانتي سالمه و بألف خير
أم ولاء
الست اللي قاعدة على الناصية قدام مستشفى رابعة العدوية..
الست اللي بتبيع خضرة:
حزم شبت , بقدونس, كسبرة,,,, مرصوصة بكل نظام و شياكه على قفص من بتوع العيش .
بس كده ! هي دي كل البضاعة بتاعتها…
ولو الحالة كويسة ممكن تجيب كام كيلو طماطم و خيار عشان السلطة تكمل .
ايه الجديد يعني؟
ماهو كل ناصية في مصر عليها ست بتسترزق ؟
اشمعني يعني أم ولاء؟
لأن أم ولاء مش بس ست مكافحة و
بتربي ايتام بعد ماجوزت بنتين.
لكن كمان هي شايلة دايما ولاد بنتها …عشان أمهم تشتغل.
و مع كل ده قاعدة تقرأ الجورنال و توزع روح الكفاح و
التفاول على كل اللي يعدي يشتري حزمة جرجير!
وأهم من كل ده الست دي فعلا فاهمة كل حاجه
ولا مفكرين النخبة اللي بيتسلوا …علينا كل يوم في التوك شو و يسودوا عيشتنا.
أم ولاء
تحسسك إن الدنيا لسة بخير و إن مصر لايمكن يتخاف عليها طول مافيها ستات زي أم ولاء
بذمتكم تستاهل التحية والسلام
ولا ايه ؟
عايزين نعرف تصرفات اكتر لان الناس دى بترفع المعنويات فى وقت كله احباطات
ردحذف