>
معبر رابعة
مش هاتكلم على رابعة وقت الاعتصام
ولا يوم الفض
مش هاوصف معاناة السكان الى اسعدهم الزمان
بالعيشه في المكان التاريخى ده
مش هاشرح ازاى الدخول و الخروج من البيت بقى
تعذيب يومى
مع انى لو اتكلمت مش هاخلص...و هاحكى حاجات
تجيب اكتئاب ... و حاجات تانية تموت من الضحك
بس دة كله كوم..... و الى بيحصلنا يوم
الجمعه من ساعة الحظر كوم تانى
يوم الجمعة
يوم الاجازة
عيد المسلمين الاسبوعى
اتحولت فيه المنطقه من ميدان رابعه لمعبر
رابعة
اى والله ... معبر بمعنى الكلمه
وبما انى ست رايقه و مرفهه
ولا يمكن تحت اى حظر انى اتنازل عن حقى فى
فسحه يوم الجمعه
حقى ومش هافرط فيه طبعا
قررت افضفض عن الى بشوفه كل جمعه وانا خارجه
(اتفسح)
الصبح بدرى وانا باوصل بتوع الثانويه العامه
الدرس بتكون المنطقه (لسه بيس)
يعنى بنخرج من الطيران عادى جدا و نصبح على
العساكر الى لسه جايين يستلموا المنطقه
وانا راجعه البيت بعد ما اخلص السوبر ماركت
تبدا المناوشات على خفيف.
ساعات العسكرى يبقى لسه مش فايق و مش مركز و
مالوش مزاج يسال انت رايحه فين يافندم
فادخل من رابعه بسلام
وساعات يكون لذيذ و رايق و يدخلنى اول ما
احلفله انى ساكنة جوه
و ساعات يطلع غله عليا و يطلب البطاقة بعد
الحلفان و يبص على العربيه من فوق لتحت
لحد كده مافيش مشاكل و اهو ادينى باتسلى
اما الفقرة التانية بتاعة بعد الصلاة لما
باروح اوصل حد مشوار يستدعى كوبرى 6 اكتوبر فبتكون الذ بكتير
طريق النصر مقفول
يوسف عباس مغلق
الطيران مقفول
ولازم نبتكر طرق جديدة للوصول للكوبرى عبر
مضيق راس الرجاء الصالح
وفى رحلة العودة لازم ندور على طرق تالتة
نرجع منها لان الى كان مفتوح من ساعه اتقفل لزوم التمويه
سامعه واحده بتضحك و تقوللى عليك من ده
بايه؟
ماتخلى ولادك ياخدوا تاكسى و خلاص.
ولا انت غاويه وجع دماغ علشان تشغلى اسطوانة
تضحيات الامهات و الابتزاز المعنوى للعيال ؟
ودى طبعا اكيد لسه ما جربتش تعبر لمنطقة رابعه
باى وسيلة مواصلات.
يوم الجمعة احنا بنكون فى منطقه معزولة
المواصلات
منزوعة الخدمات
..و الى عنده مشوار ناحيتنا مايحاولش يعدى من
معبر رابعه.
احسنله!
ليست هناك تعليقات:
إرسال تعليق