نضارة القرايه
بعد ما بلغت من العمر ارذله
- طبعا كلنا عارفين ان ارذل العمر هى الفتره من ثلاثين لحد
خمسة و تلاتين سنه عند الستات-
اكتشفت انى بقيت معوقه بصريا
يعنى استحاله اقدر اقرا اى حرف او رقم من غير النضاره
نضارة القرايه بقت عقدة حياتى وسبب كل مشاكلى مع ولادى
بصراحه حاجه تحرق الدم
خصوصا لما كل حياتك تكون بتعتمد على القراءه
طبعا اضطريت اخضع للامر الواقع وانسى ايام الشباب البائده
لما كنت باشوف كل حاجه عااااادى جدا
عملت نضارة القرايه و قلت مش مشكلة
قضا اخف من قضا
خلينى استمتع بالقراية بالنضارة
واهى كلها كام سنه و مش هادايق منها لانى اساسا هاكون
بطلت اقرا
اصلا عمرى ما سمعت عن حد بيقرا و هو عنده الزهايمر
لكن ياريتها جت على قد النضاره
زى ما يكون خوفى من الزهايمر تزامن مع استعمالى النضاره
بجد نفسى مره اعوزها والاقيها قدامى
اجى افتح الباب للسوبر ماركت و اخذ منه الفاتوره و فاجاءه
مالاقيش النضاره
اطلب من عبد الله يشوفهالى فين
طبعا ده عبد الله و عمره ما يعرف يدور على حاجه و
يلاقيها
اروح اجرى على نورا او على علشان يشوفولى الحساب كام
طب ليه مش باخلى عبد الله يقرا الفاتوره؟
مش عارفه ليه دايما انسى ان عبد الله بيعرف يقرا
مع انه مهندس ما شاء الله و يجيد اكتر من لغه
اكون بره باشترى حاجه و عايزه اشوف مكتوب عليها ايه
ادور فى شنطتى الاقينى ناسيه النضاره فى البيت
ساعات الاقى بنوته حلوه تقرالى و هى بتستعجب ان لسه فى
ناس مابتعرفش تقرا فى زمن الكمبيوتر
و ساعات اتكسف من نفسى و اشترى عميانى ارجع البيت الاقى
الحاجات صلاحيتها منتهيه
اروح رازعه النضاره فى الارض على اساس انها السبب
اخيرا ولادى قرروا يحطوا حد
لمعاناتى و حكاياتى مع نضارة القرايه
عملولى كذا نضاره
واحدة فى البيت، جنب السرير، علشان لم اقرا
قبل النوم
واحده على رخامة المطبخ علشان لما افتح
الباب لبتوع الدليفرى
و التالته فى شنطتى لما اخرج
لكن مافيش فايده فيا
برده كنت باضيعهم
اخيرا عبد الله اشترالى سلسله لكل نضاره علشان
اعلقها فى رقبتى و ما نساهاش في اى حته
لما جيت اكتب البوست ده مالقيتش ولا نضاره
والبيت كله كان بيجرى يدورلى على واحده قبل
ما الوحى يهرب
للاسف على ما لاقولى نضاره كنت نسيت انا
هاكتب عن ايه
قلت يلا مش مشكله... خلينى اكتب عن نضارة
القرايه
قبل ماتضيع تانى.
ليست هناك تعليقات:
إرسال تعليق