أعراض فيروس ث ع
عندنا فى مصر أمراض مستعصية كتير بس اخطرها
مرض فتاك بيصيب المريض و عيلته كلها معاه و يستنزف كل طاقتهم و اعصابهم.
ايــــــــــــوه هو ده: ث ع
ثانوية عامة
مرض اعراضه بتظهر على العيلة كلها
الأب المسكين
بيحلم باليوم الى محفظته ترجع تتملى فلوس زى زمان.
الفلوس راحت فين؟
ايه السؤال الساذج ده؟
هو انتوا مش عايشين فى البلد؟
طبعا الفلوس طارت من جيبه و نطت فى جيوب
اباطرة الدروس الخصوصية
ملك الفيزياء
معضلة الكيمياء
فيلسوف الأحياء
الخ
الخ الخ
وبلاش اسماء عشان محدش يزعل...
الأم المسكينه
بقه حالتها اسوأ
عماله تلف وراء العيال المصابين بعدوى ث ع
مش عارفه تركز فى شغلها ولا حتى عارفه تمشى
امور البيت الى خرجت عن السيطرة.
البيت اصلا مابقاش بيت .
يعنى ما بقاش فى مواعيد لأى حاجه وكله ماشى
بالبركة
ممنوع التنضيف علشان العيال بتوع ث ع قاعدين
فى اى حته و كل حته.
آل
ايه بيذاكروا و هى و بتحاول توفر لهم جو
مناسب....بلاش عطله....
و لا فيه طبيخ لأن المفعوصة بتاعة ث ع قرفانه
من كل الأكل و مش طايقه الريحه
و طبعا ما فيش زيارات لأن الأساتذه الخصوصيين
احتلوا البيت و احنا بقينا ضيوف.
و لا فيه تلفزيون عشان العيال ما تجييش ترشق
قدامه
و الذ حاجه كمان ان مافيش نوم لأن اعصابها
مشدوده زي سلك الكهرباء المكشوف وقاعده تعد باقى كام يوم على الإمتحان
اما بالنسبه للمريض
نفسه –فى عليتنا الحمد لله
عندنا اتنين ـ فحالته متدهوره و ميؤس منها.
ساعات يضحك زى المجنون مع ان حالته تغم .....
و ساعات يعيط من غير اسباب......
و كل ما الامتحانات تقرب تزيد اعراض
الشيزوفرينيا الحاده
يعنى مثلا ساعات العيال –على و نورا- بيجروا
ورا بعض كأن عندهم 3 سنين
و ايام تانيه وجوم تام و نوم .... نوم.... نوم -
نوم
الإبل على رأى عبد الله.
ادخل عند على الاقيه راصص الكتب و الملازم على السرير و نايم جنبهم.
أروح اوضة نورا الاقى راسها على السرير و
رجلها على المكتب.
أروح لمين؟
آل و بعد ما نستحمل كل ده نلاقى كل
الامتحانات متسربه !
يعنى احباط كمان لإن المجاميع هتعلى بسبب
الغشاشين
يعنى تعب و فلوس و حرق دم على الفاضى
يارب تشفى مصر كلها من وباء ث ع و تتوب علينا
من الهم التقيل
يلا بقى ادعوا معايا لنورا وعلى و كل مرضى ث
ع الى تعبوا .
وكل العائلات
الى اتهد حيلها.
بلاش الغشاشين.
أميــــــــــــــــــن.
بارب يااختي بارب بتوب علينا وعلي مصر كلها من عفربت الثانويه العامه
ردحذفدي االثانويه العاميه ﻻﻻﻻ مش العامه
ردحذفوبعدين العامه دايمه بتكون طيبه مش المؤذيه دي