النهارده يوم جديد
الحمد لله تخطينا مرحله الورق و الفوم و القص و اللزق و الألوان و دخلنا مرحله جديده
النهارده هنشتغل بقه شغل " بروفيشنال" شويه و هنبدأ مرحله الجبس
وما ادراك ما الجبس !!!!
تعالوا معايا أُوصِّف لكم الموقع:
حمام بيتنا الصغير
بعد مداولات عائليه مطوله استقر رأى الأغلبية علي اننا نصب الصبه فى الحمام
ماهو مش معقول هنجيب جبس و ميه و نقعد نلغوص فى الصالون
و برده السفره مش فاضيه... عليها اوراق و رسومات و بلاوى
فرشنا ارض الحمام كلها جرايد و حضرنا القصعه- قصدى- الطبق الكبير الى هانعجن فيه و قعدنا أنا و نونى على الارض
لبسنا 'جلوفز
لزوم الشغل واستعنابالله على الشقا
الكلام ده كان الساعة تمانيه مثلا
بدانا نحط ميه على الجبس و نقلب
شويه و المعلقة الي بنقلب بيها اتحجرت و مارضيتش تتزحزح من مكانها فى نص الطبق.
مش مهم.. آيه يعنى معلقه و طبق و شويه جبس و هدومنا باظو
ولا اى حاجه....
سبت نورا رهينه فى الحمام لانها لو اتحركت بجبسها هتدمرلنا البيت كله و رحت اجيب طبق و معلقه تانيين
و بدانا الجوله التانيه
طبعا أنا ماسبقليش الشغل فى البناء و معلوماتي عن الجبس منعدمه
وهى كمان
الجامعه بتاعتنا مالهاش دعوه... ولا حد قالها عن مقدار الجبس و الميه و ادينا بناخد خبره
نزود جبس يطّلع تخين... نزود ميه يطلع سائل ...نزود جبس تانى يعمل كلاكيع وهكذا دواليك لحد الساعة مابقت ١١
الموديل لازم يتسلم الصبح مصبوب و ناشف
وهى مختاره موديل معقد و كله تفاصيل عشان تبقى ' مور كريتيف ذان اذر ستودينتس،
وانا نفسى أقوم أرمى الجبس فى الزباله و اخليها تسيب للجامعه خالص
بلاها جامعه
والتعليم الى يبهدلنا كده مالوش لازمه
على المغوار الله يكرمه أنقذ نورا بعد ما أنا بعتها
عملوا جبس جديد بدون كلاكيع و بدأت مرحله الصب.
دهنا الموديل فازلين و جلسرين و بِسْم الله
الموديل اول مامسكته الجبس انهار و اتفكك ٦٠٠ حته و لولا ان نونى ناصحه و عامله موديل احتياطى كانت بقت ليله هباب
على ماجبنا الموديل التانى كان الجبس اتجمد و ضحينا بطبق جديد و بدانا تانى
الحمد لله
الموديل المره دى استحمل
وسيبناه على ارض الحمام ينشف
الصبح وهى بتاخده كانت طايره من الفرحه
حطيناه فى صندوق محكم عشان تشيله على قلبها و توريه ل T A و تاخد الدرجه
يافرحه ما تمت
فى للجامعه بتطلعه من الصندوق
لاقته فرافيت
سابته ونزلت تعيط على الارض
جنب هايدى و يقيه الدفعه اللى موديلاتهم انهارت زيها
أنا بقه عرفت و حلفت أنى مش منضفه الحمام الى لِسَّه بجبسه و جرانينه و فازلينه لحد اللحظه دى.
كفايه عماره بقى...حرام عليكو
ليست هناك تعليقات:
إرسال تعليق