التجربة النرويجية

التجربة النرويجية

أزراااااق وأخضاااار وشفااااااف وأحمااااار وأصفاااااااااااار

·       أيه ياعبد الله مالك مبهور بالألوان كده كأن عمرك ما شفت حاجة ملونه ؟

·       يا ماما دى مش ألوان زى اللى عندنا دى حاجة تانية خااااااااالص .

·       إزاى يعنى أزرق غير لون السماء بتاعنا وأخضر غير لون الزرع بتاعنا ؟

والله أنا نفسى مكسوفة وأنا بقولة " أخضر زى الزرع بتاعنا " ومتوقعة إنه مش هيقدر يمسك لسانه ويقولى " إيه ياماما إحنا هنحور على بعض هو إحنا أصلاً عندنا زرع  ولا السماء بتاعتنا لونها أزرق ، ده كل حاجة فى مصر بقى لونها ترابى"

 بس الحمد لله الولد مؤدب ومقالش كده ومحبش يحرجنى وأنا بأدافع بإستماتة عن مصر الجميلة فى مباراتها ضد النرويج الوحشة .

طبعا ً هو شاب ولازم ينبهر بالبلد الجديدة بس أنا متغاظة منه وهو عمال كل يوم يقول فى قصائد شعر عن جمال الطبيعة النرويجية .

أول يوم كان نازل من الطيارة الساعة 11.30 مساءاً وكان هيجيلة سكته لما لقى الشمس لسه طالعة عندهم فى أوسلو !!

طبعاً النرويج فى القطب الشمالى تقريباً ودى فترة تواجد الشمس عندهم مدة 20 ساعة تقريباً فى اليوم.

يلا بكرة نشوفك ياعبدالله وإنت فرحان بالشمس فى رمضان لما هتصوم لحد الساعة 12 مساءاً ومش هتلحق تتسحر لإن الفجر هيدن على طول وبكرة تعرف قيمة مصر فى رمضان وهى مزهزهة طول الليل ونايمة طول النهار .

ناس قاعدين جنبى و انا بكتب علقوا وقالوا أما إنت أم شريرة بجد ، إنتى فعلاً فرحانة فى الواد الغلبان لإن هيضطر يصوم 20ساعة ؟ إمال فين حنان الأمومة والحاجات الغريبة بتاعة الأمهات المصريات ؟

أنا فعلاً  واحشنى عبد الورد موووووووووووت – وعلى فكرة هناك أصلاً مش عارفين ينطقوا إسمه وبيقولوا عليه " دولا "

تخيلوا مهندس طول بعرض ماشاء الله عليه وإسمه دولا ؟

بالذمة مش كان قعد جنبنا هنا فى الصيف ياخدله ضربه شمس أو حبه صهد بدل الشمس الباردة الناعمة بتاعه الترويج؟

إيه يعنى السماء زرقااااا بجد

 وإيه يعنى المبانى كلها غرقانة فى بحر من الخضره والورد,

 وإيه يعنى الناس حلوين زى القمر لدرجة إنه حاسس إنه عايش فى "معرض بنى آدميين" ؟

بذمتكوا مش ده معناه إنه مش حاسس إنهم بنى آدميين بجد؟ كإنهم تماثيل فى معرض وخلاص.

إيه يعنى الشوارع نظيفة كأنهم غسلينها حالا وراشين عليها كولونيا؟

لأ وكمان فاضية وفيها lane  مخصوص للعجل وكل الشعب بيتريض.

إيه يعنى كل corner   بدل كشك السجاير عندنا و الشباب الي بيعاكسوا -قاعد فيه شويه فنانين, اللى بيعزف ساكىس ,واللى بيعزف جيتار ,واللى بيرسم واللى بيعمل ألعاب سحرية- إيه يعنى كل ده؟

ما هى مصر بردة مليانه فنانين مغمورين مش لاقين ياكلوا ولايشتروا أدوات الموسيقى، وفيها ناس راكبه عجل و تك تك فى وسط العربيات المتوحشة, وفيها حاجات لايمكن تكون موجودة عندهم فى النرويج.

 يبقى بالذمة مين أحلى؟

 أدينى كل يوم بأكلم عبد الله وأحاول أفهمة إن مصر برده أم الدنيا وإذا كان هم عندهم Rowing و Hiking فإحنا عندنا تك تك و kora sharab  وما حدش أحسن من حد.

يارب ترجعلى يا عبد الله بالسلامة وتبدأ تطبق التجربة النرويجية عندنا وما تنساش إن هم عندهم 9شهور ظلام تام وإكتئاب من قله نور ربنا.

بجد حلاوة شمسنا

وتحيا مصر