التجربة النرويجية.... تانى
ولادى بجد عندهم obsession أو ولع بالكلاب. الموضوع ده بدأ مع عبد الله وهو
صغير جدا لما كان فى أمريكا وكل الأسر بدون مبالغة عندهم كلاب. طبعا الكلاب المحظوظة
الأمريكانى لازم تتمشى كل يوم وكنا كل يوم نأخذ عبد الله الـ park - وهى حديقة
كبيرة موجودة فى كل حى زى نادى فيه كل الإمكانيات, يعنى ألعاب أطفال وممشى وكل
حاجة بس ببلاش مش زى نوادينا اللى الاشتراك فيها فلكى والكارنية مقدس.
المهم كان عبد الله كل يوم ينزل يلعب و بالمرة يراقب الكلاب ويصاحبها ويلعب
معاها وهى بتتمشى. طبعا من يومها وهو هيموت على كلب بس طبعا ينسى : ولا عندنا مكان
ولا أستعداد للكلاب والحمد لله اننا عارفين نربى العيال نفسهم.
طبعا على ونورا وارثين حب الكلاب
من عبد الله والزن على شراء كلب شغال فى بيتنا 24ساعة كل يوم من يوم ما بدأوا
يتكلموا.
وألذ حاجة إن كل واحد منهم عايز نوع معين :نورا طبعا عايزة كلب شقى ولذيذ cute وأمور وهو Golden
Retriever , أما على عايز كلب عظيم ونادر وعامل زى الحصان
وهو Great Dane والبحث مستمر
والزن مستمر على الكلاب ولا حياه لمن تنادى.
الموضوع بقة كبر فجأة لما عبد الله سافر للترويج وبدأ كل يوم يحكى لهم على
أنواع جديدة للكلاب شافها هناك وبقى عندنا حاله هيسترية منهم. قال إيه عندهم كلاب
هو أصلا مكانش عارف إنها "موجودة فى الحياة" والله ده نص كلامه
I did not
know such beautiful rare dogs exist in this world
طبعا التوأم يسمعوا الكلام ده ويتجننوا ويجننونى معاهم.
المهم أنا قلت ألاعبهم زى ما بيزنوا عليا وقلت لهم لو إتفقتوا على نوع واحد
من الكلاب إنتو الثلاثة هنشتريه. وكلى أمل فى كلاب الترويج العظيمة اللى كل يوم
بنكتشف نوع جديد فيها وإن شاء الله ولادى
عمرهم ما هيتفقوا على كلب واحد...... إدعوا معايا.
ليست هناك تعليقات:
إرسال تعليق