"أم الخدود"

"أم الخدود"

عارفين العيال الصغيرين المكلبظين لما بيكون عندهم كروش صغيور وتنيات فى رجلهم من اللظلظة؟ أنا بموت فى الصنف ده من الكلابيظ الصغيرين وما اقدرش أقاومه ....

أما النوع الألذ والأطعم هو اللى بتكون خدودهم مدلدله وطالعه بره وشهم من التخن. الخدود دى بتعمل حاجة غريبة فيه,,,, بتخلينى أفضل أبوسها – بوسة من اللى بصوت وطرقعة – لحد ما العيال يكرهوا خدودهم.... ويكرهونى.

والحمد لله ربنا ما حرمنيش من أى حاجة فى الدنيا,,,,, كل أولادى كان عندهم خاصية الخدود الملظلظة لحد ما بقى عندهم سنتين ثلاثة وفيهم حد – مش عايزة أقول أسماء – إحتفظ بالخدود والكرش الصغير لحد 10 سنين يعنى ما خلاش فى نفسى أى حاجة.

أما السبق النهاردة مش لعامه الأطفال ذوى الخدود المدلدلة الحمراء. السبق لإثنين فى العيلة واحده منهم بنتى نورا – وأنا حره أتكلم على خدودها زى ما أنا عايزة- و واحده ثانيه مش بنتى بس هى عارفه إنى بأموت فى خدودها برده. نورا كانت أول طفلة فى حياتى أشوف خدودها قبل ما تتولد . والله العظيم مش أفوره.... دى حقيقة وممكن تسألوا الطبية الأمريكية اللى عملت السونار فى عمر أربع شهور حمل وعلقت أن التوأم البنوته has plumy cheeks     يعنى البنت خدودها plumy  زى البرقوق . ولمعلوماتكوا البرقوقة فى أمريكا قد البرتقالة أم صرة بتاعتنا والست كانت معجبة بخدود نونى وهى عمرها 16 أسبوع فى بطنى,  بالذمة ده مش سبق فى عالم الخدود؟

 لكن للأسف البرقوقتين بتوع نورا خسوا وبقوا يادوب مشمشتين وضحت بيهم فى سبيل الرشاقة وعروض الأزياء . أما بالنسبة لأم خدود الثانية وهى عسولة جداً وعارفة نفسها :

 دى مدونه تحذير ليكى .

 إياك تعملى Diet  ،

 إياك تتعاملى مع خدودك بقسوة ،

 إياك أشوف سنتمتر واحد نقص فيهم لإنى ساعتها مش هأرحمك وهأعلن عن صورتك " أم الخدود " القديمة اللى عندى فى المدونه ثانى يوم .

 وقد أعذر من أنذر                                                                        

ملحوظة هامة :

لو إنت ok  مع الصورة " أم الخدود الجديدة " إبعتيها وأنا هأنزلها بكرة . بجد  No kidding  

DON'T MISS THE PARTY OF THE YEARTHE FINAL COUNT DOWN IS HEREONLY 12 DAYS ARE LEFT