بروفيترول حبيبة

بروفيترول حبيبة

كل سنة وإنتم طيبين

رمضان كريم... ولازم إحنا كمان نحاول يكون عندنا شويه كرم...
 عشان كده كل سنة فى رمضان كل فريق التنس الجامد جداً جداً جداً جداً بتاع نادى المقاولون العرب (هو يعنى مش فريق بالضبط بس روح المدربين واللاعبين فيه فعلاً أحسن من روح أى فريق رسمى) -ومنهم طبعاً توأمى اللذيذ -بيعملوا فطار جماعى.

كل واحد أو واحدةplayer or coach -- يجيب حاجة وكلهم يفطروا مع بعض فى النادى.
 طبعاً فى ناس كل سنة بتستهبل وتجيب حاجات جاهزة – هم أكيد عارفين نفسهم على أساس إن اللى على راسة بطحة بيحس بيها – وفى ناس تانية غاوية فرهده بتنوع وتعمل صوانى ومحمر ومشمر واللذى منه.

أما الحلويات فحدث ولا حرج. كنافة على بسبوسة وقطايف وحتى ساعات ناس من إياهم بيجيبوا جاتوة أو تورته علشان يخلصوا.
 وبما إن الإعتراف بالحق فضيلة فأنا كمان من اللى بيكروتوا العيال فى الحلويات لأن بينى وبين جميع المعجنات – ما عدا waffles  الى على بيعملها معايا- عداوة شديدة... وتار بايت.

 يعنى لو عملت كيك يطلع ساقط من النص أو محروق من تحت.
 ولو عملت سينابون يطلع عامل زى fossils المتحجرة من ملايين السنيين... وتضربة فى الحيطة يرجع يعورك فى وشك.
 وطبعاً من المنطقى إنى أشترى حلويات جاهزة وخلاص ولا يكلف الله نفساً إلا وسعها.... وبلاش أعمل فضايح للعيال فى النادى قدام إصحابهم ومدربينهم.

أمال إيه العنوان الفظيع ده اللى هيخلى العيال يريلوا وهم صايمين؟

 بكرة أحكى لكم.....

وكل سنة وأنتم بألف خير.....يافريق الكرم و من عجائب الصدف ان كابتن head coach  كريم  .

DON'T MISS THE PARTY OF RAMADAN AND THE WHOLE YEAR;

THE TWIN'S SWEET SIXTEEN BIRTHDAY IS ONLY

18 DAYS AWAY