نظارة ام شريف
· إيه ده ، هو انت غيرتى الشغاله؟
أمال فين عواطتشف ؟ كل يوم تجبلنا واحده جديدة؟
· لو انتى محترمه وبتساعدينى كنت ماجبتش حد . أنا مش غاويه شغالات وطول عمرى بأشتغل بإيدى لحد ما إتهديت.
· طيب دى ماتدخلش الأوضه عندى إحنا لسه مش عارفينها وأخاف تأخذ حاجه
· لا ماتخافيش ، هى اصلا مش بتشوف ويدوب بتحسس.
· برده ما تدخلش عندى.
طرااااااااااااااااااااااااااااااااااااااااااااخ
صوت اطباق بيتتدشدش وكبايات بتطير لإن أم شريف مش شايفه إن العباقرة ولادى سايبين أطباق وكبايات وحلل على كل ترابيزة فى الليفينج. هى ماشيه تنفض بفوطه ومالهاش دعوه ايه بيقع.
· لأ مش نافع كده يا أم شريف لازم نروح نكشف نظر ونعمل نظاره حلوة زيك.
· ربنا يخليكى يا دكتورة د نا نظرى ضاع خالص وعمر ما حد قالى إعملى نظاره هو بعد ما شاب ودوه الكتاب .
· ولا شاب ولا حاجه ده إنتى آخر شباب المهم إستمرت المفاوضات مع أم شريف أسبوع لحد ما رضيت تروح لدكتور العيون وجابتلى الكشف علشان نعملها النظارة.
ماشاء الله اليمين -14
والشمال-12
حاجه فله جداً أنا مش عارفه هى أصلا كانت ماشيه إزاى وإزاى بتلاقى الميكروباص اللى يروحها بيتهم
عملنا نظارة جميله طبعاً شمبر مخصوص وعدسات مضغوطه وجراب زى العسل.
وكلنا فرحانين إنها أخيراً هتشوف الدنيا بمبى.
أنا ونورا بنتخانق مين فينا تعملها المفاجأة وتديها النظاره.
طبعا انا إنتصرت وياريتنى كنت خليت حد غيرى يديها لأم شريف علشان ما إتفرسش.
· حلوة عليكى النظاره ياأم شريف مبروك
· شكراً يادكتورة
· بلاش تقلعيها خالص علشان تحافظى على عنييكى
· حاضر.
داخله المطبخ بعد 5 دقايق لاقيه النظاره مرميه على طرف البتوجاز عادى خالص.
إيه يا أم شريف قلعتيها ليه؟
أصلها واسعه عليه
طيب انا هأرجعها لبتاع النظارات يضيقها وتيجى معايا يظبطها على وشك.
المهم سحبت ام شريف ورحنا "جاجوار" محل النظارات وهناك عينها زاغت على شنمبر تانى قلت مش مشكله المهم تلبسها وتكون عاجباها.
عملنا النظارة الثانيه
جميله وزى الفل ولابسه على وشك صح يا ستى؟
أيوه والله يا دكتورة تسلم ايدك
ثانى يوم بأفتحلها الباب كنت هاقع من طولى فين النظاره يا ام شريف؟
معايا إهه يا دكتوره
طب مش لابسها ليه؟
أصل اخويا قالى متعوديش نفسك عليها.
وهو اخوكى دكتور عيون يا ست إنتى؟
لا مش دكتور بس نظره ضعيف طول عمره وماشى زى الفل من غير نظارة!!!!
إرحمينى انا مش ناقصاكى يا ام شريف.
كفاية نتىجة الانتخابات !!!!!!
ليست هناك تعليقات:
إرسال تعليق