Deep Breath

نفس عميق

إية التجليات دى؟
 كده فجأه وبعد طول انتظار مسكت القلم وهات ياكتابه وبالعاميه ؟
ليه يعنى... أمال راح فين الانجليزى والدكتوراة والأدب الأمريكانى و" قله الأدب" على رأى محمد....      
دايماً لما يلاقينى أقرأ روايه, أو قصه , يقولى طبعاً فيها " قله أدب"... حسن النيه دايماً متواجد عنده
 طبعاً جوزى وعارفه كويس,,,, بس برده لذيذ جدا.... أهو بيضحكنى كل فتره بدل الكأبه اللى بقيت فيها.

حتى لما عملت مدونة وسميتها تجليات, ماكتبتش فيها ولا كلمه.
 مش عارفه لأنى مش عارفه أعمل typing  عربى ولا لأنى ماعنديش موضوع، ولا عايزه أكتب بالانجليزى ولا مش عايزه حد يقرأ اللى بأكتبه... المهم ماكتبتش ولا كلمه.

المهم! ليه دلوقتى بأكتب ؟ مش عارفه برده, بس يمكن يكون الوقت ده هو المناسب لإنى كنت فعلاً هأنفجر لو ماعملتش كده.

حاسه فعلاً أنى بأتنفس.
طول الوقت بأبقى كاتمه نفسى... عايزة أخلص حاجه، عايزه أنجز حاجه تانيه , لسه موصلتش لهدف.
 مش هدف سامى يعنى ولا حاجه,  بس أى شىء هايف... أو مهم بأعمله وعايزه اخلصه و بسرعه.
الاول  كنت عايزة أخلص الماجستير, وبعدها أرتاح .

طبعاً ماحصلش,,, لأنى لأزم آخذ الدكتوراه كمان.
 طيب بعدها ! برده لسه لازم أبحاث,  طيب وبعدين؟
 إعاره بقه وشوية فلوس مايضروش.
 طيب أجازه بقه أرتاح من الشغل.
و هى دى الأجازه اللى خلتنى أعرف ان العيب مش فى الشغل ولا المسئوليات ولا العيال ...العيب فى أنا.

أنا واحده مابتعرفش تستمتع بأى إنجاز... ودايماً بتدور على حاجه ثانيه تعملها.
 بس خلاص"جزره وقطمها جحش" خلاص بطلت. حرمت.
 هأقف كل يوم آخذ نفس عميـــــــــــق , قبل ما أكمل وأعرف أنا رايحه فين.

دلوقتى أنا طبعاً رايحة المطبخ علشان ميعاد الغذاء!!!