القائد على 2

القائد على 2

إحنا فى    J.C. Penny وقت الـ Sale   وطبعا ً زحمة – حتى فى أمريكا يوم الأوكازيون زحمة لإنه أوكازيون بجد .

أنا مشغولة بأختار ألوان ومقاسات للعيال وعبد الله متولى قيادة الـ  stroller وعلى قاعد قدام ونورا بتزوم وراء .

طبعا ً اللى بيقعد قدام بيتسلى بالمنظر والناس وممكن يشد فى الهدوم المتعلقة وكل حاجة . يعنى بيكون مبسوط واللى بيقعد وراء بيكون شايف يا دوب قفا اللى قدام فلازم يزوم .

المهم ناديت لعبد الله علشان أورية  T. Shirt مرسوم علية Mufasa من فيلم           The lion king. طبعا ً أول ما شافة نسى العربية واللى فيها . إخواته إيه بأه ده       Mufasa  و semba أهم عنده من أمه وأبوه .

التى شيرت عجبة جداً وأصر يقيسة وأنا إنشغلت معاه لمدة ثانية علشان أشوف المقاس مظبوط ولا لأ.

طبعا كل ده وإحنا واقفين مكانا  وجنبنا ال stroller وفيها العيال.

يادوب عبدالله قلع التى شيرت النحس وبتدير لقينا العربية فيها فرد واحد: نورا الكلبوطة قاعدة وراء ومذهولة لإنها مش لاقية الراكب اللى قدامها طبعاً مش عايزة أقولكم أنا صرخت إزاى ولاقلت ايه بالعربى والانجليزى لحد ما المحل كله إتلم عليا وبدأنا رحله البحث عن الطفل المفقود على باشا.

طبعاً كلنا تخلينا إن حد شاله من العربية وهرب بيه

فقرروا قفل جميع الأبواب المؤدية لخارج المحل وكل الناس بجد كانوا متعاطفين مع الأم المصرية المجنونة وهى بتصوت على إبنها الضايع.

بردة مافيش فايدة

البطل المغوار عبدالله هو اللى حل اللغز لأن الامريكان كلهم أغبياء وقعدوا يدورا فى جميع الإتجاهات وخرجوا ناس برة يمكن يكون الحرامى خرج بالواد.

لكن عبدااله فاهم إخواته كويس وراح يدور فى حتت غريبة. نزل على الأرض وبدأ يمشى على إيدة ورجلة زى الحبو بتاع إخواتة.

طبعاً أنا قلت لاحول ولاقوة إلا بالله حتى الولد الكبير إتجنن لما أخوة ضاع!!

وتقمص شخصية الطفل وقاعد يحبى     

المنقذ عبدااله اللى كان لسه مدافع عن نورا فى موقعة البجع هو بردة اللى أنقذ على فى متاهه J.C.Penny

كل البضاعة مرصوصة على شماعات متعلقة على ستاندات وطبعاً المحل كبير جداً ومليان ستاندات واصله فيها الهدوم لحد الأرض.

طيب ليه عبدالله بيدور تحت كل ستاند؟

هو مش بيدور على جزمة على أو بيبرونه نورا. هو عارف كويس أن أخوه ممكن يكون نزل من العربية وبدأ يزحف تحت الهدوم والأستاندات.

الفكرة العبقرية دى لم تخطر على بال أى حد أصل إزاى واحد عنده ست شهور هينزل لوحدة من العربية أصلاً.

بس نظرية عبدالله طلعت صح

ما هو مهندس بالنظرة زى ماقلت لكم.

فضل يدور لحد مالقى على باشا قاعد مستخبى تحت ستاند ومعاه البيبرونة الزرقاء بتاعته والشخشيخة البمبى بتاعه نورا وقاعد ومترستأ بيشرب اللبن ويلعب وآخر مزاج.

Maaaaaaaaaaaaammmy,I Found him

Over here come. I found him over here I swear.

أنا إنهرت على أقرب كرسى وبدأت أعيط بجد وبصوت عالى من الفرحة وأنا شايلة علوش فى إيدى وماسكة نورا بالإيد الثانية فى العربية لحسن تهرب هى كمان

وهكذا أنقذ عبدالله أخوه وأختة مرة فى J.C Penny ومرة فى swam lake ومن يومها واحنا قررنا ننفى على فى المقعد الخلفى للعربية ونورا تقعد قدام لإنها مش هتفكر تهرب زية وهو وراء بيتسلى بشد شعرها.     

                              

abeerxx66@yahoo.com

ج