Surprise, Emergency room, Again!!
أهم حاجة عند ولادى فى فى موضوع الإصابات ده هو دايما ً " عنصر المفاجأة " يعنى أكون قاعدة فى أمان الله ألاقى تليفون غامض يقولى
" اجهزى ياماما علشان نروح مشوار سوا " وياريت تستنينى تحت علشان صاحبى موصلنى ومش هينفع أطلع "
طبعا ً الحمار يفهم أن فى الموضوع "إنه " وإن البطل المغوار مخبى كارثة ومش عايز يخضنى . عادى : يغمى عليا شوية وأفوق بسرعة علشان ألحق أنقذ الموقف .
وكمان بيختاروا الوقت المناسب لما أكون لوحدى وباباهم مسافر أو بعيد
يعنى يوم " صباع على " والعجلة كان باباهم فى العاشر من رمضان وتليفونه فاصل ويوم " عين عبد الله " كان مسافر بره .
المهم نطيت من البلكونة على العربية وإستنيت عبد الله اللى جه متسند على إثنين من الابطال اللى معاه فى الفريق وركبوه العربية ويلا على المستشفى . طبيب الطوارئ شاب صغير ومافيش دكاتره دلوقتى .
أصلا ً علشان نحجز دكتور كبير ممكن نستنى شهر . الأمر لله مضطرين
الدكتور : لازم أشعة حالا ً لإنها ورمت
جرى على الأشعة . خير يا دكتور
- الحمد لله مافيش كسر بس طالما ورمت قوى كده يبقى sprain Ankle ولازم تتجبس وبعدين لما تفكها نعمل علاج طبيعى .
- يعنى مش هألعب ماتشى بكرة ؟ الحمد لله إنى قدرت أمسك أعصابى وما أحدفش أى حاجة فى وش البطل .
- لأ طبعا ً راحة على الأقل أسبوعين راحة كاملة . جبسنا الرجل قلنا نعمل . check ثانى عند دكتور كبير بتاع اللعيبة الكبار .
- إيه ده مين اللى عمل كده فى رجلك ؟
- دكتور الطوارئ .
- ده دكتور متخلف ونادى على الممرضة تفك الجبس
- خير يا دكتور
- إبدا ً يا سيدى إصابتك بسيطة جدا ً إحنا هناعمل MRI رنين مغناطيسى عند دكتور فلان الفلانى مش عند أى حد وبعدين نشوف هنعمل إيه.
- طيب يعنى هينفع أمشى عادى يا دكتور.
- تمشى إزاى يعنى هو إنت عارف تحط رجلك فى الأرض احنا هنستعبط من أولها؟
- طيب يادكتورنربط رجله ثانى ولا إيه؟
- يعنى مش مهم. هو يريح لحد ما اشوف الأشعه ويأخذ الدواء ده.
- طبعاً دكتور عظيم وكبير ومش هياخذ ويدى مع ام البطل قبل مايشوف الأشعه
- بعد الرنين الدكتور عاوز يعمل عملية فى الأربطه !!
- والدكتور الكبير الثانى اللى قلنا ناخذ رأيه قال لأ مافيش أى داعى هو بس بعمل علاج طبيعى لتقوية الأربطة.
- والدكتور الصغير بتاع الطوارىء شايف ان كان لازم يفضل فى الجبس قبل العلاج الطبيعى
-
- أما الأستاذ الدكتور البطل المهندس المصاب
- قرر إنه لا هيعمل عمليه
- ولا علاج طبيعى
- وطبعاً شلنا الجبس ثانى يوم وراح يلعب الماتش ورجله لسه وارمه
- حد يقولى اعمل إيه؟؟؟
- وبما أن عبد الله هو المثل الأعلى الرياضى فى البيت فجميع المصابين من بعده بيعملوا زيه ومحدش يقدر يتكلم.
- الساعة 12 مساءاً
- ماما رجلى بتوجعنى قوى
- من إيه هو إنت اتخبطى ولا حاجه؟
- لا أنا إتصبت فى الملعب
- ولسه بتقولى دلوقتى بعد ما رجعنا بـ3 ساعات إيه اللى حصل يابنتى؟ إنتو هتجننونى؟
- رجلى إتلوت وطقطقت وكل الناس سمعوا صوت الطرقعه.
- وبعدين ليه مكلمتنيش أخذك من النادى فى ساعاتها ونلحق دكتور.
- عادى كنت عايزه اكمل التمرين
- وكملتى ياشارابوفا؟
- طبعا. قلت أستحمل الوجع شويه عادى
- عادى طبعاً
- عادى جداً
- عادى إنى أنزل أوديها الطوارىء بعد 1:30 بالليل ويتكرر السيناريو
- الدكتور يقول راحة اسبوعين
- المصابه تقول اسبوع واحد وثانى يوم تفاصل ثانى وتروح تلعب على رجلها الموجوعه عادى كله عادى!!
- ماهى الطوارى موجودة وسواقه الاسعاف موجودة
- وربنا يستر
hehe :D
ردحذف