حوار الأجيال
أنا إحترت فى كلامكوا ومابقيتش فاهمة حاجة بأحاول قد ما أقدر أكون up to date مع الشباب بس ما فيش فايدة . كل يوم كلمة جديدة و"الافتكاسات" مش بتخلص.
أكلم عبدالله مرتين ثلاثة علشان أفكرة يجيب العيش وهو راجع ولما يرجع من غيره يقولى -" سقطت يا ماما sorry "
- يا نهار أسود سقطت فى الأمتحان ولا إيه ؟
- لا " سقطت " يا حجة يعنى نسيت .
- طب ما تقول نسيت وخلاص ولا لازم العذاب
- ما ينفعش يا حجة لازم يبقى فى فرق فى حوار الأجيال أيامكوا كنتوا بتنسوا دلوقتى أحنا " بنسقط " .
- طب أيامنا مكناش بنقول لماما يا حجة إيه رأيك ؟
- يا حجة ده تعظيم ليكى . هو إنت مش فعلا ً حجيتى مرتين ؟
- طبعا ً حجيت بس مش علشان سيادتك تنادينى يا حجة .
- أمال علشان إيه ؟
- علشان .............. إنت مالك أصلا ً .
أكلمه مرة ثانية لما إتأخر علشان استعجلة يقولى حاضر يا ماما جاى فى الطريق إدينى " نصاية " .
طبعا ً يرجع بعد ساعتين ولما أساله إيه اللى أخرك يقول ياماما أنا قلت لك " نصاية " .
- يعنى إيه " نصاية " يعنى نص ساعة صح ؟
- لا... نص ساعة كانت على أيامكوا 30 دقيقة
دلوقتى بقت 120 دقيقة .
أطلب من على يعمل أى حاجة يقولى ياماما " فكك " منى!!
ولما اقول رتبوا اوضكو باسمعهم يقولوا ييييياه ماما دى غاوية "فرهده"
وأول ما بدأت أكتب كانوا بيقولوا بلاش ياماما " تسيحى " لنا on line " وتسفى " علينا قدام اصحابنا!!
طبعا ً فرق الاجيال
بس على فكرة أنا مش هأزهق ومسيرى أعرف كل كلامكوا وحركاتكوا . أنا فعلا ً بأعمل قاموس بلغة الشباب وكلها كام سنه وهأبقى معاكو ع الخط . ما تحاولوش معايا !!
أم الشباب
abeerxx66@yahoo.com
I am ready to help with ur dictionary. My parents really need it. I will contact u by e mail.
ردحذف