الزهايمر

الزهايمر

عندى خوف دفين من الزهايمر ومش عايزاكوا تستغربوا لما أقول لكم إن الخوف ده مع عوامل اخرى – هو اللى خلانى أبدأ أكتب Moments from life .

جزء فى بيقول "إلحقى دونى كل حكايات الأولاد اللذيذة الصغيرة. الحقى سجلى كل المشاعر المرتبطة بحاجات يمكن تنسيها مع إنها مهمة جداً بالنسبة لك ....
زى أول مرة إكلت التوام  وجبة صلبة وإزاى تفتفوا علينا و بوظوا سجادة الليفنج

أو أول يوم فى المدرسة لندا لما عبد الله  أصر يلبس  uniform وكرافتة وشنطة مدرسة ويروح معاها المدرسة ويعيط زيها مع إنه راجع البيت حالاً.

رغبة التدوين Documenting دى طبعاً زادت لما شفت فيلم عادل إمام
 ولما لقيت نفسى بأفتح الثلاجة وأقف قدامها 10دقائق وبعدين أقفلها وأمشى علشان مش فاكرة عايزة ايه منها أصلاً.

ولما بدور على مفتاح العربية كل مرة قبل ما أنزل مع إنى لازم باكون سايباه فى الشنطة.

ولما باسأل نورا وعلى على ميعاد التمرين مع إن معاده ما أتغيرش من 3 سنين.

قلت لا بأه... ده انا لازم ألحق نفسى قبل ما أنسى الحاجات اللذيذة بتاعه الحياه اليومية.

ووصيت العيال
وأدينى بوصى كل القراء كمان يبقوا يفتكروا لو لاقدر الله جالى الزهايمر إنهم يفتحوا لى المدونة ويفكرونى باللى فات لإنه ساعتها هيكون مات بالنسبة لى.

بس هيكون فيه مشكلة صغيرة ساعتها:

إنى مش هأبقى فاكرة هى مين عبير الجمل اللى بتمضى تحت المدونة  بأم المراهقين أو أم مصرية حائرة
ساعتها بأه ممكن تخلونى ابعت لى e-mail  أسألنى هو إنت مين؟

عرفتوا ليه دايماً بأسيب e-mail تحت كل تدوين؟

abeerxx66@yahoo.com

اللهم إجعل الحياه زيادة لنا فى كل خير وأجعل الموت راحه لنا من كل شر