الكلب الحيران
زمان وإحنا أطفال كنا بنلعب ألعاب لذيذة زى الكلب الحيران ونغنى القطة العمياء وغيرها من الحاجات الساذجة اللى كنا بنقضى فيها وقت جميل مع الأصحاب والقرايب .
إيه اللى فكرنى بالكلب الحيران فى زمن الـ PSP و PS3 و Box X و الـ Wiii ؟
الهم والغم اللى الشعب فيه هما الى فكرونى
تخيلوا إن فيه إتنين مفتريين ملعبين الشعب كله لعبة الكلب الحيران؟
للأجيال الجديدة التكنولوجية بتاعة Face book و الـ on line games , video games هأشرح لكم إيه لعبة الكلب الحيران . إللعبة دى بيكون فيها 2 بيلعبوا كل واحد فى ناحية وواحد فى النص " سقوطة يعنى او قرطاس لب" وكل همهم يجروه من غير ما يلمس الكورة اللى هم الإثنين عمالين يحدفوها لبعض وهو ( الكلب الحيران ) يدوخ فى النص لانه لو مسك الكورة هيروح يلعب مكان الاعب اللى مكنة منها.
بالظبط هو ده اللى حاصل للشعب – إحنا الكلب الحيران – ومش عايزة اقول شتيمة أكبر .
مرسى واقف فى ناحية ومعاه الإخوة والأخوات المسلمين بتوع الجماعة .
وشفيق واقف فى الناحية الثانية وحوالية حبايبة الحلوين من فئات مختلفة فى الشعب .
وإحنا ولاد " الـ " الشعب على رأى عبد الرحمن الأبنودى واقفين فى النص وهم الإثنين عمالين يطوحوا كورة الرياسة لبعض كل فرقة تمسك فيها شوية زى الكلب اللى مسك عظمة .
وكل خمس دقايق يعمل مؤتمر صحفى تحلف فيه على المصحف إن الكورة لسة معاهم وإن هما المتقدمين على الناحية الثانية وكله بالأرقام!! وإن الثانيين هم اللى بيضحكوا علينا.
وبعد شوية يطلع بتوع الناحية الثانية وبردة يحلفوا بأيمانات الدنيا أن الكورة معاهم مش مع الطرف الثانى وكلة موثق بالأرقام و الطعون واللذى منه وحنا ولاد " الـ " الشعب زى الأطرش فى الزفة مش عارفين إيه اللى بيحصل .
مش كده بقى الشعب كله " هفأ " وطرطور ومالوش لازمة زى أى فردة جزمة صاحبها استغنى عنها علشان يحدف بيها حد ؟
بالذمة ده كلام !!
حرام كفاية – كفاية حرام !!
وابقوا اسمعوا رائعة الأبنودى "احنا ولاد الكلب الشعب"
و عيطوا معايا!!!
ام مصرية مفروسة
مع إن ال"كلب الحيران" هوا صاحب الكورة و ممكن ياخدها من الإتنين و يمشى !! :(
ردحذف