عارفين العيال اللى عندهم شخصية قوية وليهم رأى فى كل حاجة؟
أكيد قابلتم مرة طفل وحسيتوا انه "أروبة" وعارف كل حاجة زى الكبار. محمد بيقول على العيال دول ألقاب لذيذة . يعنى لو ولد يقول عليه "السوسة" ولو بنت يقول عليها "مدام"- ودة طبعاً بيوضح رأية فى الستات .
لا.... لأ ماتنهوروش وتفتكروا ان فى حد من عيالى من النوع ده.
لكن أنا عندى نوع ثالث برضة لذيذ مع إنه مش بيبقى فاهم اى حاجه لكن بيتكلم فى كل حاجة ويفتى فى كل الأمور.
يعنى توقعات للجو ممكن ...
توقعات لنتائج المتشات شغال....
توقعات لإنتخابات الرئاسة مافيش مانع..... وكله بيطلع صح فى الآخر!!
إزاى معرفش!!
يعنى مثلاً تلاقيها بتقولك بكره هألبس خفيف لإن الجو هيكون نار. بناءاً على إيه القرار الحكيم ده ماتعرفش. ولاتكون سمعت النشرة الجوية اللى هى اصلاً نشرة فاشلة فى التوقع ولا أي حاجة.
مرة تانية تقولك تسونجا هيكسب جوكوفيتش مع إن جوكوفيتش مقطعة والنتيجة 6-love فى sets الاولانين وهى برده مصره
والعجيب بأه! إن أحياناً التنبؤات بتاعتها بتنفع !
وهى صغيره جداً يعنى حوالى 6،7 سنين كان عندنا كنبة عالية هى بتحب تقعد عليها وطبعاً طول ماهى قاعدة عمالة تفتى وتقول آراء غربية لاتمت للحياه بصلة. مثلاً يوم ماتش 6/1 تنبأت بالنتيجة من أول ثانية ومحدش صدقها وقد كان!!.
ولإننا كنا فى السعودية وهم بيسموا الكنب بتاعهم "المجلس" فكانت هى تعتبر قاعدة فى قلب المجلس بتاعنا. وفجأة لقينا إخواتها الإثنين بيطلقوا عليها اللقب فى نفس الوقت.
لقب إيه؟ لقب المفتى ومن يومها وهى قاعدة على كرسى الإفتاء وإحنا بنصدقها.
طبعاً مش هقولكم هى مين. أكيد إنتم عارفينها وجربتوا فتيها
أيوه .... هى دى بالضبط . الامورة
abeerxx66@yahoo.com
ليست هناك تعليقات:
إرسال تعليق